کتاباں تُوں دُوری کیوں؟ ساڈے سماج نوں کویں پڑھن تے لایا جا سکدا اے؟

کتاباں تُوں دُوری کیوں؟ ساڈے سماج نوں کویں پڑھن تے لایا جا سکدا اے؟

ساڈے سماج بارے کسے نے بڑی سوہنی گل کیتی سی کہ ایتھے ساڈے سماج وچ کباباں والی دُکاناں تے ہجوم تے کتاباں والیاں دُکاناں تے کوئی بندا ای نظر نہیں آندا اے۔ایہ سماج وچ کویں واپرگئی تے کدوں واپر گئی ایس دا اندازا لاون دی وی کھیچل نہیں کیتی گئی اے۔ سماج دی ترقی رُک جاون دی اک وجھا تاں ایہ وی اے کہ اسیں کتاب توں دُور ہو چُکے آں۔اج دا انسان جوایتھے وس رہیا اے اوس نوں اپنی ذہنی ودھوتری بارے اُکا خیال نہین آندا اے۔اسیں اک دوجے توں دولت کماون دی دوڑ وچ اگے نکلنا چاہ رہے آں تے ایس واسطے چنگے بھیڑے ہر حربے نوں ورتدے رہندے آں۔معاشرے دے کئی کھیتراں وچ زوال ایس کارن وی اے کہ اسیں علم توں دُور ہوندے چلے گئے آں۔

اج جے اسیں اپنے سماج نوں ترقی ول ودھدا ویکھنا چاہنے آں تے ایس واسطے علم دوستی،کتاب دوستی سبھ توں پہلا مرحلا اے۔جِنا چر لائبریریاں آباد نہیں ہوون گئیاں حالات نہیں سُدھر سکن گے۔اُستاداں نوں وی ایس سلسلے وچ اپنا کردار ادا کرنا پوے گا ایس لئی اوس نوں خُد وی مثالی بننا پوے گا۔شاگرد جے اپنے استاد دا علم نال پیار نہیں ویکھے گا تے اوہ کدے وی علم نہیں حاصل کرن لگا اوہ صرف رٹو توتا ای بن کے رہ جاوے گا۔انج ای اج ساڈے سماج وچ ہو رہیا اے لوکاں دے نمبر تاں نوّے فیصد آندے نیں پر آندا جاندا کُجھ نہیں اے۔

کسے نے کہیا سی

”جس گھر وچ کتاب نہیں اے اوہ گھر قبرستان اے “

ایہ کتاباں نہ پڑھن دیاں کئی وجوہات نیں جہناں نوں ایس مضمون وچ سمونا ممکن نہیں اے پر فیر وی کجھ گلاں نال چانن کیتا جا سکدا اے آؤ اوہناں وچوں کجھ گلاں تے چانن پاندے آں۔کتاباں نہ پڑھن دی اک وجھا ایہ وی اے کہ اسیں ایہناں نوں صرف ڈگریاں لئی تے نوکری دے حصول لئی مخصوص کیتا ہویا اے۔سبھ توں پہلاں ایس سوچ توں نکلنا ات ضروری اے۔

کتاب سانوں جیون دا ڈھنگ سکھاندی اے۔ حیاتی دیاں اوکڑاں نوں سوکڑاں وچ بدل دی اے۔کتاب دے پڑھن لئی سبھ توں پہلاں دلچسپی دا ہونا ضروری اے۔کتاباں نہ پڑھن د ی ا ک وجھا ایہ وی اے کہ ویلے دی کمی۔ویلے دی کمی پاروں ای کہانیاں نے جنم لتا سی پر ہن تاں لوکاں نے ایہہ وی گھٹ کر دتا اے۔ایہدا اک بہترین حل اے کے کتاباں دی سمری نوں ویڈیو دی صورت وچ پیش کیتا جاوے تاں جے لوک گھٹ ویلے وچ بہتے لابھ لے سکن تے ایہ ویڈیو بُہتی لمی وی نا ہووے۔ایس ویڈیو دے وچ کتاب دے اصل مقصد بارے دسیا جا سکے۔ایس ویڈیو نوں ڈاکومینٹری وی کہیا جا سکدا اے۔

ایس توں اَڈ لوکاں وچ آگاہی دا ہونا وی ضروری اے کہ کس طرحاں دیاں کتاباں پڑھنیاں چاہیدیاں نیں۔کیوں کہ کُجھ لوکاں نوں کتاباں پڑھن دا شوق تے ہوندا اے پر اوہناں نوں اپنی دلچسپی سمجھ وچ نہیں آندی سبھ توں پہلاں اپنی دلچسپی نوں سمجھنا ات ضروری فیر کسے چنگے بندے نال صلاح کرنی چاہیدی اے کہ ہن اوہ کیہڑی کتاب پڑھے۔ کتاباں دے فروغ لئی ایہناں دی قیمت نوں وی ساہمنے رکھنا چاہیدا اے کہ کتاباں دی قیمت مناسب ہووے۔کیوں جے چنگیاں کتاباں دی قیمت وی زیادہ ہوندی اے جس کر کے کوئی نہیں وی خرید سکدا تے ایس پاروں وی پڑھن توں رہ جاندا اے۔