قائد اعظم ؒ نے فرمایا اقلیتاں دے برابر دے حقوق نیں: پاکستان دی پہلی ہندو سوانی سینیٹر کرشنا کوہلی کماری دی گلبا ت ــــــ٭ رویل نیوز٭

اسلام آباد ( سرفراز اعوان ولوں) پاکستان دی پہلی ہندو سوانی سینیٹر کرشنا کوہلی کماری نے کہیا اے کہ قائد اعظم ؒ محمد علی جناح نے پاکستان اسلام نے اسلام دے ناں تے بنایا تے نال ایہ وی فرمایا کہ اقلیتاں دے برابر دے حقوق ہوون گے۔اسیں پاکستان وچ جنمے تے پاکستان واسطے اپنی جان قربان لئی کدے پچھانہ نہیں ہٹاں گے۔اج پاکستان وچ وسدے ہندو جیون دے ہر کھیتر وچ اپنا پنا کردار ادا کر رہے نیں۔

اک سوال دے جواب وچ اوہناں دا کہنا سی کہ جویں مسلمان بھرا اپنیاں عبادتاں لئی مسیتاں جاندے نیں ،مسیحی بھین بھرا چرچ جاندے نیں انجے ای ہندو برادری وی چاہندی اے کہ ایہناں دی مذہبی عبادت واسطے ایہناں دیاں عبادت گاہواں بنائیاں جاون ۔اوہناں نے کہیا کہ اسلام آباد دے علاقے ایچ نائن ٹو وچ چار کنال تھاں سرکار نے کرشنا مندر دی اُساری لئی دتی سی جس بارے ایسے ای شہر دے اک واسی نے عدالت وچ درخاست دائر کر دتی اے کہ ایس مندر دی اُساری نوں روکیا جاوے تے ایہ بہت ای افسوسناک اے۔

اوہناں نے کہیا اے اوہی لوک نیں جہناں دی وجھا کر کے ای پاکستان دا سافٹ امیج نوں بدنما دا غ لایا جا رہیا اے۔جے ہندوستاں وچ اقلیتاں نوں مسیتاں وچ نماز ادا کرن توں روکیا جاوے تاں اسیں کہنے آں کہ اوتھے اقلیتاں اُتے ظلم ہو رہیا اے۔جے ایہو کجھ پاکستان وچ ہوئے تاں پاکستان دے سافٹ امیج دے خلاف پراپیگنڈا کرن دا موقعا دیواں گے۔اوہناں نے کہای کہ اسیں بھارت دے کشمیر وچ مسلماناں دی مذہبی اَزادی اُتے پابندی لاون دی شدید نندیا کرنے آں۔

پارلیمانی سیکریٹری برائے انسانی حقوق لال مالہی نے کہیا اے کہ وفاقی دارالحکومت وچ مندر اُساری رکوان واسطے عدالت نال رجوع کرنا افسوسناک اے ،ایس طرحاں ہندوواں دا دل دُکھیا اے اوہناں کہیا اے کہ پاکستان دا آئین و تےقانون سبھ نوں مکمل مذہبی ازادی دیندا اے ۔پاکستان وچ کافی مذہباں دے منن والے وسدے نیں تے سبھ دے برابر دے حقوق نیں۔اسلام آباد وچ وسدیاں ہندوواں دے نال نال باہروں آون والے یاتری وی ایس مندر وچ اپنی عبادت لئی سوکھت محسوس کرن گے۔

اوہناں نے اپنی گلبات وچ ہور کہیا کہ کرشنا مندر واسطے H-9/2 میں 4 کنال پلاٹ نیشنل کمیشن آف ہیومن رائٹس دی ہدایت تے CDA نے 2017 وچ ہندو پنچائت اسلام آباد نوں الاٹ کر کے قبضا دتا سی۔ مندر دے پلاٹ دے برابر وچ کرسچن کمیونٹی تے پارسی کمیونٹی نوں وی پلاٹ الاٹ کیتے گئے نیں ۔مندر دی اُساری دے حوالے نال اک وفد وزیر اعظم عمران خان نال وی ملیا اے تے میں وفاقی وزیر برائے مذھبی امور نورالحق قادری نوں وی ہدایات جاری کر دتی گئی اے۔