عمران حکومت تذبذب دا شکار

عمران حکومت تذبذب دا شکار

نفیس حیدر

پاکستان دے وزیراعظم جناب عمران خان 3 واری اسمبلی وچ داخل ہوئے جو کہ خش آیند گل اے کیوں کہ 22مہینے دے اقتدار دے عرصے وچ اوہ کدے انج مسلسل اسمبلی وچ وکھالی نہیں دتے۔ خورے اوہ اپنے آپ نوں اُسے خلائی مخلوق دا حصا سمجھدے نیں جہدا ذکر کردے ہوئے نواز شریف نوں جیل دا مونہ ویکھنا پے گیا۔ جے عمران خان صاحب اپنے آپ نوں خلائی مخلوق نہیں سمجھدے تے ضرور اپنے آپ نوں کوئی انج دی عجوبا مخلوق ضرور سمجھدے نیں جس پاروں اوہ پارلیمنٹ یاں پاکستان دے سیاستداناں نوں اپنے لایق نہیں سجھدے تے ایسے گھمنڈ وچ اوہ سنگین ترین حالات وچ وی اسمبلی دا رُخ نہیں کردے سن پر بجٹ پاس ہون توں لے کے ہن تیکر اوہ اسمبلی دا حصا وی بنے تے اپنی دھواں دار تقریراں نال اپنے حامی سیاستداناں تے لوکائی نوں دوبارا اپنے درینا دشمناں دی نشاندہی کیتی۔

حالات جو مرضی ہون عمران خان اِکو تقریر دے دوالے گھمدے تے چور اُچکیاں نوں کیفر کردار تیکر اپڑان دیاں گلاں کردے ای وکھالی دیندے نیں۔ موجودا حالات دے پیش نظر وزیراعظم عمران خان نے مسائل نوں تھوڑا تھوڑا بیان کیتا تے فیر اپنے آپ نوں پارسا تے ایماندار قرار دین تے اپوزیشن نوں کرپٹ تے لٹیرے قرار دین اتے ای زور دتا۔

چور چور دی رٹ توں وکھ کسے وی معاملے وچ عمران خان بوکھلاہٹ تے تذبذب دا شکار ای وکھالی دیندے نیں۔ کرونا وایرس اتے وی اوہناں دے ملے جلے بیان آوندے رہے۔ اک دن ٹویٹ وچ اوہ لاک ڈاون کرن دی گل کردے نظر آوندے تے دوجے دن لاک ڈاون دی سخت مخالفت کرن اتے اتفاق کردے وکھالی دیندے۔ وزیراعلا سندھ مراد علی شاہ نے 18 ویں ترمیم توں فایدا چکدے ہوئے اپنے صوبے وچ لاک ڈاون اتے سختی نال عملدرآمد کرا کے کافی حد تیکر تباہی توں سندھ نوں محفوظ رکھیا۔ اوہدے اتے وی عمران خان نے برہمی دا اظہار کیتا تے آکھیا کہ انج نظام نہیں چلے گا۔ جے من لیا جاوے کہ انج نظام نہیں چلے گا تے جناب عمران خان صاحب ایہ وی دس دین کہ نظام چلے گا کویں۔ غربت وچ تیزی نال وادھا ہوندا جارہیا اے۔ حکومت دے نوکریاں دین دے سب جھوٹھے دعوے دھرے دے دھرے رہ گئے نیں تے اوہدے بجائے جہڑے لوک کوئی نوکریاں کر کے گھر دا گزارا چلا رہے سن اوہناں نوں وی نوکریاں توں جواب ہوگیا اے تے بے روزگاری وچ بہت تیزی نال وادھا ہویا اے۔

بھانویں کرونا وایرس دی سنگینی ہووے یاں جہاز کریش دا معاملا ہووے یاں فیر سٹاک ایکسچینج اُتے حملے دی گل ہووے جناب عمران خان ولوں غیر سنجیدگی دا مظاہرا ویکھن وچ آیا اے۔ اوہ ملکی مسائل اتے مختصر گل کر کے اپنی دشمنی نوں بیان کرن لگ پیندے نیں کہ پچھلی حکومت نے کرپشن کیتی کجھ باقی نہیں چھڈیا ملک دا دیوالیا کر دتا سانوں قرضے وچ ڈُبا ملک ملیا ایہنوں ترقی دیاں راہواں اتے گامزن کرن وچ کجھ ویلا لگے گا۔

عمران خان دی پالیسی تحت جو سمارٹ لاک ڈاون دا تماشا مختلف شہراں دے علاقیاں وچ رچایا جارہیا اے اوہدے توں کرونا وایرس گھٹ ہون دی کوئی اُمید نہیں کیتی جاسکدی، کیوں کہ جہڑے جہڑے علاقے بند کیتے گئے نیں اوہ صرف میڈیا دی حد تیکر ای بند کیتے گئے نیں، سب معاملات اپنے معمول مطابق چل رہے نیں۔ کوئی ایس او پیز دا خیال نہیں کررہیا حکومت اپنی باندر ونڈ دی سیاست وچ مصروف اے ملکی معاملات بارے اوہنوں کوئی اگاہی نہیں تے نہ کوئی اگاہ کرن والی اپوزیشن ای موجود اے۔ بظاہر جو اپوزیشن وکھالی دے رہی اے اوہ اپنے مسائل وچ ایس قدر رُجھی پئی اے کہ اوہ بجٹ مخالف بل تیکر پیش نہیں کرسکے سگوں اوہناں اسمبلی توں واک آوٹ کرنا مناسب سجھیا۔ واک آوٹ توں تحریک انصاف نوں بجٹ پیش کرن وچ بے حد فایدا اپڑیا تے اوہناں بغیر کسے رولے رپے تے مخالفت وچ نعرے بازی توں اطمینان نال بجٹ پیش کیتا تے بااسانی منظور وی ہوگیا۔ سیاسی تے ملکی حالات اودوں درستی ول جاندے نیں جدوں اپوزیشن مضبوط ہووے۔ اپوزیشن جنی مضبوط ہووے گی ملک اونی چھیتی تے تیزی نال ترقی دیاں راہواں ہموار کرے گا پر پاکستان دے جمہوری نظام نوں ایس طریقے نال ترتیب دتا گیا اے کہ ظاہری طور تے اوہ جمہوریت ای نظر آئے اوہدے پس پردا بھانویں اوہ ڈکٹیٹر شپ ہووے یاں اسٹیبلشمنٹ ہووے یاں کوئی خلائی مخلوق اوہنوں تسیں کوئی وی نام دے سکدے او، اوہو حکومت چلا رہی ہوندی اے۔ ہر واری ایس قوت نال ن لیگ دی حکومت نے ٹکر لئی تے ہر وارحکومت ہتھوں جاندی رہی۔ ہن وی موجودا وزیراعظم عمران خان جنی دیر تیکر کٹھ پتلی بنے رہن گے اونی دیر تیکر اوہ اقتدار دی کُرسی اتے فایز رہن گے جویں اوہناں حقیقی پاور والیاں دی من مرضی خلاف بیان دتا یاں پالیسی واضح کیتی اوہ دن وزیراعظم دی سیٹ اتے آخری دن ہووے گا، ایس لئی تے اک لمحے عمران خان ایہ آکھدے نیں کہ میرا کوئی متبادل ای نہیں اے ایہ حکومت اپنی مدت پوری کرے گی تے دوجے لمحے ای ماینس ون دیاں گلاں کردے نیں۔ ایہدے توں اندازا ہوندا اے کہ کدرے کدرے جناب عمران خان صاحب نوں وی اقتدار دی کرسی ڈگمگاندی وکھالی دے رہی اے۔ اوہناں نوں وی علم اے کہ بلاول بھٹو زرداری ٹھیک آکھدا اے کہ تیریاں ڈوراں کوئی ہور ہلا رہیا اے تے جدوں گُڈی ڈور مطابق تُنکے کھا کھا نہیں اُڈے گی اپنی من مرضی کرے گی تے گُڈی نوں ڈور توں وکھرا کردتا جاوے گا تے کٹی ہوئی گُڈی دا کیہ حال ہوندا اے ایہ سبھ جاندے نیں۔

سٹاک ایکسچینج اتے حملے بارے وزیراعظم عمران خان نے بغیر سوچے سمجھے ایہدا سارا ملبابھارت اتے پا دتا کہ سٹاک ایکسچینج اتے حملا بھارت نے کرایا۔ایہ گل صرف پاکستانی لوکائی نوں دشمن مخالف اشتعال دوان لئی کیتی گئی جہدا کوئی سر پیر ای نہیں۔ پاکستان نے بغیر کسے ثبوت دے بھارت اتے الزام عاید کیتا کہ کراچی سٹاک ایکسچینج اتے حملا بھارت نے کرایا ایہ بالکل اُنج ای اے جدوں بھارت وچ کوئی حملا ہوندا اے یاں کوئی نقصان ہوندا اے تے اوہ بغیر کسے ثبوت دے پاکستان اتے الزام لا دیندا اے۔ ایہ دوویں مخالف ملک ایہو جہے الزام ایس لئی لاندے نیں تاں جے موجودا معاملات توں لوکائی دی نظر ہٹ جاوے تے دوجا دشمن ملک دے لوکائی خلاف اپنی لوکائی وچ اشتعال تے جنگجو ذہنیت قایم رہوے۔

ساڈے امن دے گہوارے ملکِ پاکستان وچ تھاں تھاں چوراہیاں تے پارکاں تے تاریخی مقاماں اتے جنگی سازو سامان رکھ

کے پاکستانی لوکائی نوں ذہنی طور تے جنگجو تے دشمن مخالف عناصر قایم کرن دی کامیاب تکنیک اپنائی گئی اے۔ جے کدے کدرے پاکستان وچ تفریح واسطے تفریحی مقامات اتے وی چلے جاو تے فطرت دے مناظر دی بجائے اوتھے وی تہانوں توپاں تے جنگی جہاز تے ٹینگ تے تلواراں تے جنگجوواں دے مجسمے لگے وکھالی دین گے۔ ساڈی سوچ نوں مذہبی تے جنگجو بنا کے غلام بنا دتا گیا اے۔ عمران خان جس ویژن ریاست مدینہ دے ناں اتے اقتدار وچ آئے اوہ نظام وی سپر پاور دا تیار کردا اے۔ اوتھے وی نظام وچ تبدیلیاں آرہیاں نیں۔ ہن عمران خان کس قسم دی تبدیلی چاہندے نیں تے کس ویژن مطابق اگلے ساڈھے 3سال لنگھاندے نیں ایہ تے ویلا ای دسے گا، پر اِکو ناپی تولی تے گنی متھی تقریر نال گل نہیں بنے گی ہن عمران خان نوں اسٹیبلشمنٹ دا ترلا امارنا چاہیدا اے کہ اوہ ڈُگڈگی وجان لئی کوئی ہور شے دین تاں جے حکومت باقی دے سال پورے کرسکے۔ تے جے انج ای رہیا تے لوکائی غربت دی جس لکیر اتے اپڑچکے نیں تے عمران خان تے فیصلیاں توں جویں تنگ آچکے نیں اوہ دن دور نہیں جدوں لوکائی دے ہتھ عمران خان دے گریبان تیکر اپڑ جان گے۔