kraamaat@gmail.com
+ +92 333-430-6384


جج ارشد ملک نُوں برطرف کرن دے فیصلے نے نہ صرف نواز شریف سگوں عدل و انصاف دے دامن اُتے لگا اِک وڈا داغ دھو دِتا::شہباز شریف  ……٭رویل نیوز٭


نمائندا رویل July 04, 2020


لاہور (نمایندا رویل) پچھلے وزیراعظم نواز شریف دے خلاف فیصلا دین والے احتساب عدالت دے جج ارشد ملک نُوں برطرف کر دِتا گیا اے۔ پچھلے جج ارشد ملک دی برطرفی دا فیصلا چیف جسٹس لاہور ہائیکورٹ محمد قاسم خان دی صدارت ہیٹھ ہون والے لاہور ہائیکورٹ دی انتظامی کمیٹی دے اجلاس وچ کیتا گیا۔ جہدے وچ لاہور ہائیکورٹ دے انتظامی کمیٹی دے نال سینئر ججاں نے رلت کیتی تے کمیٹی نے احتساب عدالت دے پچھلے جج ارشد ملک دی برطرفی دی منظوری دِتی۔ اجلاس وچ جسٹس ملک شہزاد احمد خان‘ جسٹس شجاعت علی خان‘ جسٹس عائشہ اے ملک‘ جسٹس شاہد وحید تے جسٹس علی باقر نجفی‘ جسٹس محمد امیر بھٹی نے رلت کیتی۔ یاد رہوے کہ جج ارشد ملک نے 24 دسمبر 2018 نُوں العزیزیا ریفرنس وچ نواز شریف نُوں 7 سال قید دی سزا سنائی سی تے فلیگ شپ ریفرنس وچ بَری کیتا سی‘ عدالتی فیصلے دے بعد 6 جولائی 2019 نُوں مریم نواز اِک ویڈیو ساہمنے لیائے سن جہدے وچ الزام لایا گیا کہ جج ارشد ملک نے دباء وچ آ کے ایہ سزا سنائی جہدی جج نے تردید وی کیتی سی۔ ایس توں وکھ پچھلے وزیراعظم نواز شریف دی دھی مریم نواز نے کہیا اے کہ جج ارشد ملک نُوں برطرف کرن دے فیصلے نے نہ صرف نواز شریف سگوں عدل و انصاف دے دامن اُتے لگا اِک وڈا داغ دھو دِتا‘ انصاف کدی ادھا نہیں ہوندا‘ داغدار جج دے داغدار فیصلیاں نُوں وی پاڑ کے سُٹیا جاوے‘ نواز شریف دا صبر جت گیا‘ اللہ تعالیٰ بے گناہ تے بہادر لوکاں نُوں کلا نہیں چھڈدا‘ ایہ فیصلا بے شک سچ دی فتح تے جھوٹھ دی شکست اے‘ اللہ دا بے انتہا شکر جہدے گھر نہ دیر اے نہ اندھیر اے‘ ہُن عدلیا دے وقار تے انصاف دا تقاضا اے کہ داغدار جج دے داغدار فیصلیاں نُوں وی پاڑ کے سُٹیا جاوے۔ مسلم لیگ ن دے صدر تے نواز شریف دے چھوٹے بھرا شہباز شریف نے ارشد ملک دی برطرفی دے فیصلے اُتے تشکر دا اظہار کردیاں ہویاں کہیا اے اللہ نے ملک دی خدمت کرن والے نواز شریف دی بے گناہی نُوں ثابت کر دِتا‘ ثابت ہو گیا کہ جج نے انصاف اُتے مبنی فیصلا نہیں دِتا سی‘ ہُن انصاف دا تقاضا اے کہ نواز شریف دے خلاف سزا نُوں ختم کیتا جاوے۔ وزیراعظم دے معاون خصوصی برائے احتساب شہزاد اکبر نے اپنی ٹویٹ وچ کہیا کہ ارشد ملک دی تعیناتی شاہد خاقان عباسی نے کیتی سی‘ جج بلیک میل کیس دے2 کرداراں وِچوں اِک ارشد ملک برطرف ہو گئے‘ کھیڈ دا دوجا کردار مریم نوز نیں‘ اوہناں نے جج دی ویڈیو استعمال کر کے اپیل اُتے اثر انداز ہون دی کوشش کیتی‘ اپیل اُتے سزا ہونا باقی اے۔