کرونا وایرس دے روگیاں وچ وادھا 78بندے جیون دی بازی ہار گئے……٭رویل نیوز٭

اسلام آباد (نمایندا رویل) ملک وچ کرونا وایرس دے روگیاں دی گنتی وچ وادھا جاری‘ ہور 78 بندے زندگی دی بازی ہار گئے۔ نیشنل کمانڈ اینڈ اپریشن سنٹر دے تازاآنکڑیاں دے مطابق کرونا وایرس دے روگیاں دی گنتی 2 لکھ 21 ہزار 896 تک جا اپڑی‘ ایکٹو کیساں توں ودھ صحتیاب ہون والے روگیاں دی گنتی ودھ لگی اے‘ صحتیاب ہون والے روگیاں دی گنتی 1 لکھ 13 ہزار 626 ہو گئی‘ پچھلے 24 گھنٹیاں وچ 8929 روگیاں نے کرونا نُوں شکست دِتی جد کہ ہور 78 بندے زندگی دی بازی ہار گئے‘ این سی او سدے مطابق پچھلے 24 گھنٹیاں وچ 4 ہزار 87 نویں روگی رپورٹ ہوئے۔وفاقی وزیر منصوبا بندی تے کمانڈ اینڈ اپریشن سینٹر دے آگو اسد عمر نے کہیا اے کہ ایس او پیز اُتے عملدرآمد بہتر ہون نال کرونابارے صورتحال بہتر ہوئی اے جہدے نال پورے ملک وچ اج ہسپتالاں وچ روگیاں دی گنتی تے آکسیجن دی لوڑ والے بندیاں دی گنتی جو دے ادھ توں گھٹ اے پر کراچی سنے سندھ وچ کرونا دی صورتحال چنگی نہیں۔ اسد عمر نے کہیا کہ ملک وچ ایس او پیز اُتے عملدرآمد بارے ہر ہفے جایزا لیا جاندا اے‘ جون دے ادھ وچ20 شہراں وچ ہاٹ سپاٹ دی نشاندہی کیتی گئی پر جون دے ادھ دی نسبت ہسپتالاں وچ کرونا روگیاں دی گنتی گھٹ اے۔ اوہناں نے کہیا کہ کرونا بارے صورتحال وچ بہتری نظر آ رہی اے تے ایس او پیز اُتے عملدرآمد بہر ہون نال صورتحال بہتر ہوئی اے‘ جے حالات مناسب رہے تے جولائی دے آخر وچ کرونا دے روگیاں دی گنتی 4 لکھ تک ہووے گی۔ وفاقی وزیر دا کہنا سی کہ لوکائی نے ایس او پیز اُتے عملدرآمد بہتر بنایا جہدے نال وباء گھٹ ہوئی‘ جے انتظامی کارروائی نہیں کراں گے تے ہو سکدا اے کہ جولائی دے اخیرتک 12 لکھ بندے کرونا نال متاثر ہون‘ ساڈے ساریاں دے ہتھ وچ اے کہ ایس وباء توں اپنے آپ نُوں کویں بچا سکیے‘ زیادا تربندیاں نے حکومت تے ڈاکٹراں دیاں ہدایتاں اُتے عمل کیتا‘ صرف کراچی وچ بہتری نظر نہیں آئی جہدے نال سندھ حکومت دے نال رَل کے حکمت عملی بنا رہے آں۔