kraamaat@gmail.com
+ +92 333-430-6384


فاروق آباد جاتری روڈ اُتے واقع پھاٹک اُتے کوسٹر بس ٹرین حادثا،دُکھانت وچ سکھ پرواردے 19 مسافر واصل……٭رویل نیوز٭


نمائندا رویل July 04, 2020


شیخوپورا (نمایندا رویل) فاروق آباد جاتری روڈ اُتے واقع پھاٹک اُتے کوسٹر بس ٹرین نال وج گئی‘ دُکھانت وچ سکھ پرواردے 19 مسافر واصل تے8 زخمی ہو گئے‘ ریسکیو 1122 شیخوپورا دی امدادی ٹیم نے موقع اُتے پہنچ کے زخمیاں نُوں طبی امداد دے کے ڈی ایچ کیو ہسپتال منتقل کیتا تے لاشاں نُوں گڈی توں کڈھیا۔ ریسکیو حکام دے مطابق کوسٹر وچ سکھ خاندان سوار سی جہدا تعلق پشاور نال سی‘ خاندان دے اسرے بندے قریبی عزیز دی فوتگی اُتے ننکانا صاحب آئے سن‘ ننکانا صاحب توں واپس پشاور جاندیاں ہویاں سچا سودا گردوارا دے کول کوسٹر بس ڈرائیور نے پھاٹک توں پچھے کچے راہ توں بس لنگھان دی کوشش کیتی‘ ایس دوران کوسٹر کراچی توں لاہور جان والی شاہ حسین ایکسپریس نال وج گئی جہدے نال کوسٹر وچ سوار 27 بندیاں وِچوں 19بندے واصل ہو گئے جد کہ 8 زخمیاں نُوں ریسکیو اہلکاراں نے دُکھانت دا شکار ہون والی کوسٹر توں کڈھ کے ہسپتال منتقل کیتا‘ واصل ہون والیاں وچ 11 بندے تے 8 سوانیاں شامل نیں جد کہ زخمیاں وچ 2 بچیاں سنے 8 بندے شامل نیں جہناں دی حالت وی ماڑی دَسی گئی اے۔ ترجما ن ریلوے دا کہنا اے کہ وزیر ریلوے سیخ رشید نے واقعے دے ذمے داراں خلاف فوری کارروائی دا حکم دِتا اے‘ ڈی ای این نُوں فوری طور اُتے معطل کر دِتا گیا اے۔ وزیراعظم عمران خان تے صدر عارف علوی سنے مختلف سیاسی آگوواں ولوں دُکھانت اُتے افسوس دا اظہار کیتا گیا اے جد کہ زخمیاں نُوں بہترین طبی امداد دین دی ہدایت دِتی گئی اے۔