مہنگائی تے لوڈ شیڈنگ نال لوکائی پریشان……٭رویل نیوز٭

لاہور‘ اسلام آباد (نمایندا رویل) ملک وچ انھی مہنگائی تے لوڈشیڈنگ نے لوکائی دیاں چیکاں کڈھوا دِتیاں‘ اِک ہفتے دے دوران مہنگائی دی شرح وچ 2.29 فیصد وادھا ہویا‘ اِک ہفتے دے دوران آنڈے‘ ٹماٹر‘ چکن‘ گنڈھے‘ کھنڈ‘ آٹے تے پٹرولیم مصنوعات سنے 18 شیواں مہنگیاں ہوئیاں‘ دال چنا‘ دال مسور‘ آلو تے تھوم سنے 7 شیواں سستیاں ہوئیاں جد کہ 26 شیواں دیاں قیمتاں مستحکم رہیاں جہدے نال سالانا بنیاداں اُتے مہنگائی دی شرح 9.77 فیصد ہو گئی۔ آنکڑیاں مطابق اِک ہفتے وچ کھنڈ دی قیمت وچ 24رُپئے فی کلو وادھا ہویا‘ سرخ مرچ 19 رُپئے‘ ٹماٹر 11 رُپئے فی کلو‘ آنڈے ڈھائی رُپئے فی درجن‘ مرغی دا گوشت ساڈھے 4 رُپئے‘ دال ماش 1 رُپئے‘ 20 کلو آٹے دا تھیلا 250 توں 300 رُپئے‘ ایل پی جی دا گھریلو سلنڈر 68 رُپئے مہنگا ہویا جد کہ پٹرول ڈیزل‘ کھنڈ‘ چاؤل‘ گنڈھے وی مہنگے ہوئے۔دوجے پاسے لاہور سنے پورے ملک دیاں مختلف تھاواں اُتے غیر اعلانیا تے اعلانیا لوڈشیڈنگ نے لوکائی دیاں چیکاں کڈھوا دِتیاں‘ بجلی دی لمی بندش نال شہری پانی دی کنی کنی نُوں ترس گئے‘ مختلف علاقیاں وچ لوڈشیڈنگ دا دورانیا 8 گھنٹے توں ٹپ گیا جد کہ مختلف تھاواں اُتے بوسیدا ترسیلی نظام دی وجھا توں وی لوکائی نُوں کئی کئی گھنٹے لوڈشیڈنگ دا عذاب جھیلنا پے رہیا اے‘ کرونا وایرس دی وجھا توں گھراں وچ اکلاپا اختیار کرن والے روگی شدید اوکڑاں نال دوچار ہو گئے۔