پاکستان اپنے گوانڈھی ملکاں دے نال پرامن طور اُتے رہن اُتے یقین رکھدا اے:وزیراعظم عمران خان دی صدارت ہیٹھ اجلاس……٭رویل نیوز٭

اسلام آباد (نمایندا رویل) وزیراعظم عمران خان دی صدارت ہیٹھ ملک دی داخلی تے خارجی سلامتی صورتحال اُتے جایزا لین لئی اعلا سطح دا اجلاس ہویا‘ وزیر دفاع پرویز خٹک‘ چیئرمین جوائنٹ چیفس آف سٹاف کمیٹی جنرل ندیم رضا‘ آرمی چیف جنرل قمر جاوید باجوا‘ چیف آف نیول سٹاف ایڈمرل ظفر محمود عباسی‘ چیف آف ائر سٹاف چیف مارشل مجاہد انور خان تے ڈائریکٹر جنرل آئی ایس آئی لیفٹیننٹ جنرل فیض حامد نے اجلاس وچ رلت کیتی۔ اجلاس وچ ملک دی داخلی تے خارجی سلامتی صورتحال دا جایزا لیا گیا تے ایس عزم دا اعادا کیتا گیا کہ پاکستان دی سالمیت دا ہر قیمت اُتے دفاع کیتا جاوے گا۔ اجلاس وچ کہیا گیا کہ پاکستان اپنے گوانڈھی ملکاں دے نال پرامن طور اُتے رہن اُتے یقین رکھدا اے پ ایہدے نال نال اپنی لوکائی تے علاقائی سالمیت دے دفاع دی خاہش تے صلاحیت دوویں رکھدے آں۔ اجلاس وچ مقبوضا کشمیر وچ بھارتی فوجاں دے ہتھوں انسانی حقاں دیاں مسلسل خلاف ورزیاں اُتے سخت تشویش دا اظہار کیتا گیا تے عالمی برادری توں ایہدا نوٹس لین دا مطالبا کیتا گیا۔ اجلاس وچ قانون نافذ کرن والے اداریاں دی بہادری تے منظم کوششاں نُوں خراج تحسین پیش کیتا گیا جہناں نے پاکستان سٹاک ایکسچینج اُتے حالیا حملے نُوں کامیابی نال ناکام بنایا۔ ایس توں وکھ وزیراعظم دی صدارت ہیٹھ پاکستان چین اقتصادی راہداری دے تحت منصوبیاں دی ٹورا کاری اُتے جایزا اجلاس ہویا۔ اجلاس وچ وزیراعظم نے سی پیک اتھارٹی دی کمکاری اُتے اطمینان دا اظہار کیتا۔ وزیراعظم نے اجلاس نال خطاب کردیاں ہویاں کہیا کہ پاکستان چین اقتصادی راہداری پاکستان دی سماجی تے معاشی ترقی دے حوالے توں اِک بہترین منصوبا اے تے پاکستان دے روشن مستقبل دی ضمانت اے۔ وزیراعظم نے ایس عزم دا اعادا کیتا کہ پاک چین دوستی دے مظہر سی پیک منصوبے نُوں ہر حال وچ پایا تکمیل تک پہنچاواں گے تے ایہدے ثمرات ہر خاص تے عام تک پہنچا ئے جان گے۔ *****