دُشمن دے مقابلے لئی فوج تے قوم نُوں اِک پیج اُتے آن دی ضرورت اے، شرمندگی دا ٹیسٹ ہوندا تے 22 کروڑ لوکائی دا رزلٹ مثبت آ سکدا اے: امیر جماعت اسلامی پاکستان سینیٹر سراج الحق……٭رویل نیوز٭

لاہور (نمایندا رویل) امیر جماعت اسلامی پاکستان سینیٹر سراج الحق نے کہیا اے کہ سٹیبلشمنٹ اپنا نیوٹرل رول بحال کرے‘ دشمن نال لڑنا اے تے قوم تے فوج نُوں اِک پیج اُتے ہونا چاہیدا اے‘ جماعت اسلامی مہنگائی دے خاتمے‘ بیروزگاری تے لوکائی دے حقاں لئی تحریک چلائے گی تے ہر مظلوم دی اواز بنے گی‘ حکومت یرغمال‘ صل حکمرانی مافیاز دی اے۔ حکومتی رِٹ کدھرے نظر نہیں آندی‘ جمہوری حکومتاں وچ اسٹیبلشمنٹ دا کردار غیر جانبدار ہوندا اے‘ ساڈے ملک دی اسٹیبلشمنٹ الیکشن اُتے اثر انداز ہوندی اے‘ ہر تھاں ایہدے اُتے لوک گل کردے نیں تے انگلیاں چُکدے نیں‘ جنی حکومت اُتے گل ہوندی اے اونی ای اسٹیبلشمنٹ اُتے وی گل ہوندی اے‘ اسٹیبلشمنٹ نُوں کسے اِک پارٹی دے نال نتھی ہون دی بجائے اپنی غیر جانبداری دے تاثر نُوں بہتر بنان لئی سوچنا پوے گا‘ فوجی نُوں مضبوط بنانا پاکستان دی ضرورت اے‘ بھارت ورگا مکار دشمن اژدھے دی صورت وچ سرحداں اُتے موجو اے۔ دشمن دے مقابلے لئی فوج تے قوم نُوں اِک پیج اُتے آن دی ضرورت اے‘ فوج دا تقدس تے خشحالی غیر جانبدارانا کردار وچ ای اے‘ قوم اپنی فوج نال محبت کردی اے‘ کوئی جوان شہید ہوندا اے تے ہر گھر وچ ماتم ہوندا اے‘ جدوں فوج اپنا وزن کسے خاص پلے وچ پاندی اے تے ایہدا خاص اثر ہوندا اے‘ اسلام آباد وچ 5 مندر پہلے ای موجود نیں اوہناں دی بحالی دے اقدامات کیتے جان‘ عمران خان سنے ہر حکمران سمجھدا اے کہ اوہناں دا متبادل نہیں‘ ماضی وچ وی جہڑے حکمران رہے اوہ فوج دی سرپرستی حاصل ہون دے دعوے‘ فوج دی حمایت و چ بنن والیاں حکومتاں کوئی رزلٹ نہیں دے سکیاں۔ ایہناں خیالاں دا اظہار اوہناں نے منصورا وچ مجلس عاملا دے دو دنا اجلاس دے بعد پریس کانفرنس نال خطاب کردیاں ہویاں کیتا۔ سینیٹر سراج الحق نے کہیا کہ جے اج فیصلیاں اُتے شرمندگی دا ٹیسٹ ہوندا تے 22 کروڑ لوکائی دا رزلٹ مثبت آ سکدا اے۔ پی ٹی آئی نُوں ووٹ دین و الی لوکائی تے ینگ ڈاکٹرز اپنے فیصلے اُتے پچھتا رہے نیں۔