kraamaat@gmail.com
+ +92 333-430-6384


ملک وچ 30 جون نُوں ختم ہون والے مالی سال وچ اوسط مہنگائی 10.74 فیصد رہی……٭رویل نیوز٭


نمائندا رویل July 06, 2020


اسلام آباد (نمایندا رویل) ملک وچ 30 جون نُوں ختم ہون والے مالی سال وچ اوسط مہنگائی 10.74 فیصد رہی۔ ادارا شماریات دی رپورٹ دے مطابق 1 سال وچ آٹے دا 20 کلو تھیلا 204 رُپئے مہنگا ہویا جہدے نال قیمت 844 توں ودھ کے 1048 رُپئے ہو گئی۔ سرکاری رپورٹ وچ کہیا گیا اے کہ اِک سال دے دوران کھنڈ 8 رُپئے 79 پیسے فی کلو مہنگی ہوئی جہدے نال ایہدی قیمت 72.03 رُپئے توں ودھ کے 80.82 رُپئے فی کلو ہو گئی۔ جولائی 2019 توں جولائی 2020 وچ ٹماٹر 27 رُپئے کلو مہنگا ہویا۔ ایسے عرصے وچ لال مرچ 109 رُپئے‘ مرغی 39 رُپئے کلو مہنگی ہوئی۔ 1 سال وچ آنڈے 33 رُپئے درجن‘ گُڑ 20 رُپئے فی کلو مہنگا ہویا۔ ایہدے علاوا دال مونگ 92‘ دال ماش 68‘ دال مسور 34‘ دال چنا 10 رُپئے فی کلو مہنگی ہوئی۔ جولائی 2019 توں جولائی 2020 وچ چاؤل 6 رُپئے فی کلو مہنگے ہوئے۔ چھوٹا گوشت 80 رُپئے تے وڈے گوشت دی قیمت وچ 41 رُپئے واداھا ہویا۔ 1 سال وچ آلو 26 رُپئے‘ تھوم 3 رُپئے فی کلو مہنگا ہویا‘ دُدھ 7 رُپئے لیٹر‘ سُکا دُدھ 390 گرام 46 رُپئے مہنگا ہویا۔ دستاویز دے مطابق گھیو 50 رُپئے فی کلو‘ چاہ 190 گرام 19 رُپئے‘ دہی 5 رُپیے تے کیلے دی قیمت وچ فی درجن 3 رُپئے دا وادھا ویکھیا گیا۔ 30 جون نُوں ختم ہون والے مالی سال وچ اوسط مہنگائی 10.74 فیصد رہی۔ مالی سال 2018-19 وچ اوسط مہنگائی دی شرح 6.80 فیصد سی۔