سستی بجلی واسطے ازاد پتن ہائیڈرو پاور پراجیکٹ،700 میگا واٹ بجلی پیدا ہووے گی  منصوبے دا افتتاح  وزیراعظم  نے کیتا ……٭رویل نیوز٭

اسلام آباد (نمایندا رویل) ازاد پتن ہائیڈرو پاور پراجیکٹ دے معاہدے اُتے دستخط‘ منصوبے نال 700 میگا واٹ بجلی پیدا ہووے گی۔ ازاد پتن ہائیڈرو پراجیکٹ معاہدے دی تقریب نال خطاب کردیاں ہویاں وزیراعظم نے کہیا کہ منصوبا سرمایا کاری اے‘ ملک اتے بھار نہیں پوے گا۔تفصیل دے مطابق ازاد پتن ہائیڈرو پاور پراجیکٹ دے معاہدے اُتے دستخط کر دِتے گئے نیں‘ ایس منصوبے نال 700 میگا واٹ بجلی پیدا ہووے گی جد کہ ملازمتاں دے 3 ہزار موقع پیدا ہون گے۔ منصوبے دی افتتاحی تقریب نال خطاب کردیاں ہویاں وزیراعظم عمران خان دا کہنا سی کہ چین دی ترقی نال اسیں بہت کجھ سکھیا اے‘ سی پیک منصوبا پاکستان نوں بہت اُتے لے کے جاوے گا۔ وزیراعظم دا کہنا سی کہ بدقسمتی نال ماضی وچ سستی بجلی اُتے توجا نہیں دِتی گئی‘ قرضیاں دی ملکاں نُوں بڑی بھاری قیمت ادا کرنی پیندی اے۔ اسیں قرضا لے کے پاور پراجیکٹ نہیں بنا رہے آں‘ ایہ انویسٹمنٹ اے۔ اوہناں دا کہنا سی کہ پاک چین اقتصادی راہداری مختلف مرحلیاں وچ اگے ودھ رہیا اے۔ ازاد پتن ہائیڈرو پاور منصوبا سی پیک دا پراجیکٹ اے۔ ساڈیاں ترجیحاں کلین انرجی اے‘ ایہدے نال ماحولیات اُتے وی اثر نہیں پوے گا۔ وزیراعظم نے کہیا کہ 90 دی دہائی دے بعد مہنگی بجلی دا اکانومی اُتے بہت اثر پیا۔ ہائیڈرو پاور منصوبے دی بجلی نال بہت فایدا ہووے گا۔ مہنگی بجلی نال انڈسٹری نُوں نقصان ہویا۔ مہنگی بجلی نال ہر شعبے اُتے فرق پیا۔ تقریب نال خطاب وچ اوہناں دا کہنا سی کہ درآمدی تیل نال لوکائی نُوں بجلی دی بڑی بھاری قیمت ادا کرنی پئی‘ مینوں خُشی اے کہ ہُن بجلی پاکستان وچ موجود پانی نال بنے گی۔ ایہناں منصوبیاں نال ساڈے کلین تے گرین پاکستان دا خاب شرمندا تعبیر ہووے گا۔