کسان تے عام شہری  نال نا انصافی نہیں برداشت،آٹے دیاں قیمتاں کیوں ودھیاں؟آٹے دی تھوڑ نوں مُکایا جاوے:وزیراعظم عمران خان ……٭رویل نیوز٭

اسلام آباد (نمایندا رویل) پنجاب وچ آٹے دیاں قیمتاں وچ وادھا‘ وزیراعظم عمران خان نے نوٹس لے لیا۔ وزیراعظم عمران خان نے سخت ہدایتاں جاری کردیاں ہویاں کہیا اے کہ ذخیرا اندوزاں نُوں پھڑو یاں سبسڈی دوو‘ غریب نُوں سستا آٹا فراہم کرو۔ وزیراعظم نے جے آٹی رپورٹ دے تناظر وچ کھنڈ دی ذخیرا اندوزی خلاف ہور مؤثر کارروائی دی ہدایت کردیاں ہویاں کہیا کہ ملاوٹ خلاف زیرو ٹالرینس پالیسی اختیار کیتی جاوے‘ کنک دی گھٹ قیمت تے بلا تعطل دستیابی حکومت دی پہلی ترجیح اے‘ کنک تے آٹے دیاں قیمتاں وچ سارے صوبیاں وچ یکسانیت دے نال نال ہر صوبے وچ لوڑ دے مطابق مناسب سٹاک نُوں یقینی بنایا جاوے۔ تفصیلات مطابق وزیراعظم عمران خان دی صدارت ہیٹھ ملک وچ کھاون پیون شیواں دیاں قیمتاں وچ کمی لیان دے اقدامات دے حوالے توں جایزا اجلاس ہویا۔ اجلاس وچ وزیر برائے نیشنل فوڈ سیکیورٹی سید فخر امام، مشیر خزانا ڈاکٹر عبدالحفیظ شیخ، مشیر تجارت عبدالرزاق داؤد، معاون خصوصی ڈاکٹر شہباز گل تے سینئر افسراں رلتی سن۔اجلاس وچ صوبا پنجاب، سندھ، بلوچستان دے چیف سیکرٹریز تے ایڈیشنل چیف سیکرٹری خیبر پختونخواہ وی ویڈیو لنک راہیں رلت کیتی۔ صوبائی چیف سیکرٹری صاحبان نے اجلاس نُوں بنیادی لوڑی دیاں شیواں دیاں قیمتاں وچ کمی لیان لئی اقادمات تے ایہناں اقدامات دے نتیجے دا تقابلی جایزا پیش کیتا۔کرونا وایرس دی صورتحال دے تناظر وچ صوبیاں وچ ضروری دوائیاں تے آکسیجن دی سپلائی نُوں بال تعطل ممکن بنان دے حوالے توں وی رلتیاں نُوں تفصیلی اگاہ کیتا گیا۔ چیف سیکرٹری پنجاب نے کھنڈ تے آٹے دی ذخیرا نادوزی دے خلاف کریک ڈاؤن دا ذکر کردیاں ہویاں اجلاس نُوں اگاہ کیتا کہ ہُن تک 716 ٹن آٹا تے 1 ارب توں ودھ مالیت دی 16008.5 ٹن کھنڈ ذخیرا اندوزاں تے دیلراں توں تحویل وچ لئی گئی اے جدکہ پنجاب وچ کھنڈ دی قیمت سبھ توں گھٹ اے۔ وزیراعظم عمران خان نے پنجاب سرکار نُوں آٹے دیاں قیمتاں وچ کمی لئی اقدامات دی ہدایت کردیاں ہویاں کہیا کہ ہر حال وچ آٹے دی قیمت پرانی سطح اُتے بحال کردیاں ہویاں ذخیرا اندوازاں خلاف سخت کارروائی کیتی جاوے۔ وزیراعظم نے جے آئی ٹی دی رپورٹ دے تناظر وچ کھنڈ دی ذخیرا اندوزی دے خلاف ہور مؤثر کارروائی دی ہدایت کیتی تے کہیا کہ ملاوٹ دے خلاف زیرو ٹالرینس پالیسی اختیا ر کیتی جاوے‘ کنک تے آٹے دی لوکائی نُوں بلا تعطل تے گھٹ قیمت اُتے دستیابی نُوں ممکن بنان دے حوالے توں چیف سیکرٹری پنجاب نے رلتیاں نُوں اگاہ کیتا کہ پنجاب کابینا دی منظوری دے بعد صوبائی حکومت تقریبن 35 ارب رُپئے مالیت دی کنک کل ریلیز کر رہی اے۔ ایس اقدام دی بدولت نہ صرف آٹے دی تھوڑ ختم ہووے گی سگوں کنک تے آٹے دی قیمت وچ مرحلا وار کمی وی ہووے گی۔ وزیراعظم عمران خان نے صوبا پنجاب ولوں کنک دے حوالے توں فیصلے نُوں سلاہندیاں ہویاں کہیا کہ کنک دی گھٹ قیمت تے بلا تعطل دستیابی حکومت دی پہلی ترجیح اے۔ اوہناں نے ہدایت کیتی کہ ایس امر نُوں یقینی بنایا جاوے کہ کنک دی بین الاقوامی آوا جائی دے حوالے توں کوئی دقت پیش نہ آئے۔ وزیراعظم عمران خان نے وزیر برائے نیشنل فوڈ سیکیورٹی سید فخر امام دی اگوائی وچ سارے صوبائی چیف سیکرٹری صاحبان نُوں کنک تے آٹے دے حوالے توں مربوط تے ہم آہنگی حکمت عملی مرتب کرن دی ہدایت کیتی تاں جے کنک تے آٹے دیاں قیمتاں وچ سارے صوبیاں وچ یکسانیت دے نال نال ہر صوبے وچ ضرورت دے مطابق مناسب سٹاک نُوں یقینی بنایا جاوے۔وزیراعظم نے ہور ہدایت کیتی کہ ایس حکمت عملی دا محور کسان تے عام شہری ہون کیوں جے ماضی وچ منافع خوری تے ذخیرا اندوزی وچ ملوث عناصر نے نہ صرف کسان نُوں ایہدے جایز منافع توں محروم کیتا سگوں عام بندے نُوں وی بُہتی قیمت اُتے آٹا خریدن اُتے مجبور کیتا۔