kraamaat@gmail.com
+ +92 333-430-6384


پچھلے 24 گھنٹیاں وچ کرونا نال 50 بندے واصل،3 ہزار 344 نویں کیسز  کُل 2 لکھ 31 ہز ار 818 کیسز رپورٹ ہو گئے ……٭رویل نیوز٭


نمائندا رویل July 07, 2020


اسلام آباد (نمایندا رویل) پاکستان وچ کرونا وایرس نال واصل ہون والے بندیاں دی گنتی 4 ہزار 762 ہو گئی اے تے 2 لکھ 31 ہزار 818 کیسز رپورٹ ہو چکے نیں۔ نیشنل کمانڈ اینڈ اپریشن سینٹر ولوں جاری آنکڑیاں دے مطابق پچھلے 24 گھنٹیاں وچ کرونا نال 50 بندے واصل ہوئے نیں جو کہ ماضی دی نسبت بہت گھٹ گنتی اے۔ 44روگیاں دا انتقال ہسپتالاں تے 6 دا گھراں وچ ہویا۔ رپورٹ دے مطابق ملک وچ کرونا وایرس دے 3 ہزار 344 نویں کیسز رپورٹ ہوئے نیں۔ بلوچستان تے گلگت بلتستان وچ پچھلے دن کرونا وایرس نال کوئی مَوت رپورٹ نہیں ہوئی۔ پاکستان وچ صحت یاب بندیاں دی گنتی 1 لکھ 31 ہزار 649 ہو گئی اے۔ دوجے پاسے 12 ملکاں دے 239 سائنسداناں نے دعوا کیتا اے کہ کرونا وایرس ہوا نال کھلر رہیا اے۔امریکی میڈیا مطابق عالمی ادارا صحت دے ناں اِک کھلے خط وچ 12 ملکاں دے 239 سائنسداناں نے کہیا کہ ایہ وایرس ہوا راہیں انفیکشن کھلاردا اے تے بند تھاواں اُتے وی ایہدے توں بچن لئی احتیاط کرنی چاہیدی اے۔ اوہناں دا ہور کہنا سی کہ اوہ کرونا وایرس توں بچن لئی اپنیاں ہدایتاں اُٹے نظرثانی کرے‘ اِک سائنسی رسالے وچ ایس خط دے مندرجات چھاپے جان گے۔ سائنسداناں دا کہنا اے کہ کرونا وایرس ہوا نال کھلردا اے تے ساہ لیندیاں ہویاں ایہ ذرات انسانی جُسے دے اندر جا سکدے نیں۔ خط وچ ہور کہای گیا کہ دنیا دے ملکاں نُوں وایرس نُوں ہوا نال کھلرن توں روکن لئی تدبیرا بدلنیاں ہون گیاں‘ لوکاں نُوں ماسک گھراں دے اندر وی لانا پوے گا جد کہ سو ن ویلے وی ماسک نُوں نہیں لانا چاہیدا ایسے طرحاں وینٹی لیٹر ز نظام وچ وی تبدیلی لیانی پوے گی تے ہوا دی گردش نُوں گھٹ توں گھٹ کرنا پوے گا۔ دوجے پاسے عالمی ادارا صحت ڈبلیو ایچ او تے یو ایس سینٹر فار ڈیزیز نے سائنسداناں دا دعوا رَد کردیاں ہویاں کہیا کہ وایرس صرف دو طرحاں کھلر سکدا اے‘ تُسیں کسے کرونا روگی دے نیڑے ہووے تے کھنگ دیوے تے کھنگ دیاں چھِٹاں تہاڈے تک آ جان تے تُسیں متاثر ہو سکدے او تے دوجا کسے آلودا تھاں نُوں ہتھ لان دے بعد اپنی اکھ‘ نکتے مونہ نُوں ہتھ لا لوو۔