ادکاری دی نسبت گلوکاری مشکل فن اے: شاہدہ منی……٭رویل نیوز٭

لاہور (نمایندا رویل) پرائیڈ آف پرفارمنس گلوکارا شاہدہ منی نے کہیا اے کہ اداکاری دی نسبت گلوکاری مشکل فن اے‘ سنجیدا گلوکار ریاضت نُوں کدی نہیں چھڈدا سگوں ایہدے لئی ضرور ویلا کڈھدا اے۔ اِک انٹرویو وچ گلبات کردیاں ہویاں اوہناں نے کہیا کہ موسیقی وچ مشاہدا نہیں سگوں ریاضت سبھ توں ودھ ضروری اے تے میں روزانا موسیقی دی ریاضت کردی آں۔ شاہدہ منی نے کہیا کہ میں بے شمار فلماں وچ ہیروئن دے رول ادا کیتے‘ اداکاری وی مشکل فن اے پر گلوکاری ایس توں ودھ مشکل اے۔ اوہناں نے کہیا کہ پاکستان نُوں ایہ اعزاز حاصل اے کہ بھارت دی نسبت پاکستان وچ وڈے گلوکار پیدا ہوئے جہناں نے اپنے فن راہیں دنیا وچ اپنی تے پاکستان دی پچھان بنائی اے۔