بچ جاؤ۔۔۔۔طلاق جے۔۔۔۔۔

ایہ مضمون لکھن دا کارن اِک خبر بنی جس نوں چاند بابو نے سنایا اوہ اَج وی پہلاں وانگ ای مُکھ توں ہوائیاں اُڈاندیاں ای آیا سی۔آندیاں ای خبر سناون لگا کہ اوہناں دی طلاق ہو گئی جہناں دی کئی مہینیاں توں ڈھیر لڑائی چل رہی سی ۔ روز اوہناں دی خبر اوہ مینوں سُنا کے ای چاہ دا کپ پھڑدا ہوندا۔اَج کہن لگا اخیراوہناں دوواں دی طلاق ہو گئی ،ہُن اوہ راضی راضی نیں تے اپنا اپنا سامان پیک کر کے جاون دا سوچ رہے سن۔کیوں جے مالک مکان نے وی رولا ہمیش لئی مکاون دا سندیسا دِتا ہویا تے اَج ایہ رولا ہمیشا واسطے مُک چُکیا سی۔میرے وار وار پُچھن دی لوڑ ای نہیں پئی، چاند بابو کہن لگا دوواں نوں کوئی ہور لبھ گیا بُڈھی کہوے مینوں تیرے ورگا ہور لبھ گیا تے بندا کہوے میں وی تیرے ورگی لبھ لئی اے بس ایس گل تون بعد لڑائی مُک گئی تے طلاق ہو گئی۔۔۔۔۔گل تے بُری ہوئی پر ہاسے والی ایہ گل سی کہ دوواں نے لبھنے جے پہلاں ورگے ای سن تے فیر اینا تماشا لاون تے وکھاون دی کیہ لوڑ سی۔ایہ تماشا ہُن وی تاں شروع ہو سکدا اے پر ایہ وی تاں ہو سکدا اے کہ طلاق توں بعد کسے اِک نوں ہوش آ ای اجاوے گی۔

طلاق ،طلاق تے طلاق ۔۔۔ایہ اوہ تِن شبد جہناں نوں ورتن لئی اوہ کرنا پیندا اے جس نوں اجہیا لڈو کہیا جاندا اے جو کھاوے اوہ وی پچھتاوے ،جو نہ کھاوے اوہ وی پچھتاوے۔ ایس لئی پچھتاوا بھالن لئی ہ کوئی اُتاؤلا رہندا اے۔ایسے کر کے تاں چھتاں تے بنیریاں تے جا کھلو کے ٹھنڈ وچ فون پیکج نوں پورا ضائع کرن دے وسیلے بھالے جاندے نیں۔ایس نال نمونیا تے ٹھنڈ لگ جاون نال جہڑی بماریاں پھیلدیاں نیں اوہناں نال ہور کسے نوں فائدا ہووے نہ ہووے ڈاکٹر دی دال روٹی اوس دی ہٹی نال ای چلدی رہندی اے۔

طلاق دی اِک وجھا میک اپ آرٹسٹ نیں جو ووہٹی نوں اِک دن واسطے اینا سوہنا بنا دیندے نیں کہ لاڑھا ہاسیاں ہاسیاں وچ ای اوس نوں گھر لے آندا اے تے جدوں اوہ بغیر میک اپ توں ویکھدا اے تاں فیر اوہ اپنے ای گھر وڑھن توں ڈردا رہندا اے کیوں جے روز تے اوہ مونہ واسطے ۳۰ ہزار دا میک اپ نہیں کروا سکدا تے ایس تیہہ ہزار نوں دوگھنٹیاں یاں اِک شام مگروں گٹر وچ رُڑھدا وی نہیں ویکھ سکدا۔۔۔۔۔

فون پیکج وی کافی حد تک طلاقاں واسطے ذمے وار نیں ایہ خبر جدوں پتا چلی تاں اوس دی کھوج لاندیاں جہڑا انکشاف ہویا اوہ کجھ ایس طرحاں سی کہ اوس سوانی نے صرف ایس لئی طلاق لے لئی کیوں جے اوہدا گھر والا اوس نوں مہینے دا فون کال تے نیٹ پیکج نہیں سی لے کے دیندا صرف میسجاں نوں اوہنے سر وچ مارنا سی۔ ایس لئی سُکھی گھر وساون لئی ضروری اے کہ مہینے دا اِک پیکج کروا دِتا جاوے تاں ای چنگا اے ایس طرحاں اک تاں فون والیاں دی ملٹی نیشل کمپنیاں دا کاروبار چلدا رہوے گا تے دُوجا تہاڈے گھر دا چُلھا وی بلدا رہوے گا۔ رشتے دار وی طلاقاں دے کارن بن جاندے نیں ایس لئی نہیں کہ اوہ بُہت ساری مدا خلت کردے رہندے نیں سگوں ایس لئی وی کہ اوہ بس ایہ ای کردے رہندے نیں۔ووہٹی دیاں سوہنیاں کزناں تے سہیلیاں نوں جدوں لاڑھا ویڈیو وچ یاں سیلفی وچ اکٹھیاں ویکھدا اے تاں اک احساس ِپچھتاوا شروع ہو جاندا اے جو ہولی ہولی اجہیا لاوا بن جاندا اے جو طلاق دی نوبت وی لیا سکدا اے ایس لئی ایہناں توں جِنا وی ہو سکے بچیاجاوے تاں ای چنگا اے۔ طلاق بارے بُہتا وی پڑھن دی ہُن لوڑ وی نہیں کیوں جے جہڑا کم نہیں وی کرنا ہونا اوس نوں کرن دا وی دِل کر سکدا اے ایسے لئی جے جان پیاری تے اپنی وی جان پیاری اے تے فیر ایس توں بچ کے ای رہو گے تاں طلاق توں وی بچے رہوگے۔۔۔۔۔۔۔۔۔۔۔اگے تُساں نے کدی مَنّی تاں ہے نہیں اے۔۔۔۔۔۔۔۔۔۔۔۔۔۔۔۔۔