حکومت دا ڈاؤن فال شروع ہو چکیا سی: مولانا فضل الرحمان ……٭رویل نیوز٭

جیکب آباد (نمایندا رویل) جمعیت علمائے اسلام دے آگو مولانا فضل الرحمان نے کہیا اے کہ 18 ویں آئینی ترمیم وچ تبدیلی ملکی اکسُرتا تے ایکتا لئی خطرناک ثابت ہووے گی‘ وفاق دیاں آئینی ذمے داریاں نُوں صوبیاں اُتے لانا غلط اے‘ ملکی حالات ایہو جہے نہیں کہ پی ٹی آئی نُوں ہور برداشت کر سکیے‘ حکمران عزت نال استعفا دے دین ورنا انجام ہور گندا ہو جاوے گا۔ ایہناں خیالاں دا اظہار اوہناں نے جے یو آئی ضلع جیکب آباد دے امیر ڈاکٹر اے جی انصاری دے بھرا ڈاکٹر عبدالکریم انصاری دی وفات اُتے تعزیت دے بعد جامعہ مدنیہ وچ جے یو آئی دے وفد نال گلبات کردیاں ہویاں کیتا۔ مولانا فضل الرحمان نے ہور کہیا کہ معاشی بد حالی انتہا نُوں پہنچ چکی اے‘ حکومت بوکھلاہٹ دا شکار ہو گئی اے‘ ملکی تے عوامی مسئلیاں وچ کمی دی بجائے وادھا ہو رہیا اے‘ رُپئے دی قدر ڈِ گ گئی اے‘ صنعتاں بند تے روزگار بھیانک صورتحال اختیار کر چکیا اے‘ معیشت‘ معاشرت تے ملکی نظام تباہی دے دہانے اُتے پہنچ گیا اے۔ اوہناں نے ہور کہیا کہ اداریاں نُوں نجکاری راہیں بہتر نہیں کیتا جا سکدا سگوں اداریاں دے انتظامی امور نُوں بہتر کر کے اوہناں دے پیداواری عمل وچ وادھا کرن نال ہوندا اے۔اوہناں دا کہنا سی کہ ساڈے دھرنے دے بعد حکومت دا ڈاؤن فال شروع ہو چکیا سی‘ جے پیپلز پارٹی تے مسلم لیگ (ن) ساڈے وانگوں میدان وچ نکلدے تے اج نقشا تبدیل ہوندا‘ اپوزیشن دے غلط کردار دی وجھا توں حکومت نُوں طول ملیا‘ ہُن اپوزیشن نُوں رویا تبدیل کرنا چاہید اے۔