خوشامدیاں توں دور رہن دی کوشش کردی آں: نادیہ علی ……٭رویل نیوز٭

لاہور (نمایندا رویل) اداکار ا‘ پرفارمر نادیہ علی نے کہیا اے کہ خوشامدی لوکاں توں دور رہندی آں‘ زندگی وچ کامیابیاں دی وجھا اپنے کم نال ایمانداری اے۔ اِک انٹرویو وچ اوہناں نے کہیا کہ انسان دا جو مقدر اے اوہی اوہنوں ملدا اے‘ میں مسلسل محنت نال کامیابیاں حاصل کر رہی آں‘ میرے نیڑے کوئی نمبر ون یاں نمبر 2 نہیں ہوندا ہر فنکار اُتے مقبولیت دا اِک دور آندا اے جدوں اوہ لوکاں وچ مقبول ہو جاندا اے پر ایہدا مقصد ایہ نہیں کہ کوئی نمبر ون بن جاندا اے۔ فن دی دنیا وچ اُنج وی نمبر ون یاں نمبر 2 کسے ڈکشنری وچ نہیں لکھیا۔ نادیہ علی نے کہیا اے کہ اداکاری‘ ناچ‘ اداکاری تے گائیکی وچ ساڈے کول باصلاحیت بندیاں دی کی نہیں‘ بھارت سنے پوری دنیا دے نال سانجھیاں فلماں بنان نُوں فروغ دینا ہووے گا۔