سینئر نے زندگی دا وڈا حصا فن دی خدمت وچ لنگھایا: صباء قمر ……٭رویل نیوز٭

لاہور (نمایندا رویل) نامور اداکارا صباء قمر نے کہیا اے کہ مینوں ایس گل دا دِلی افسوس اے کہ اج تک زیبا شہناز‘ شہزاد رضا‘ ذوالقرنین حیدر‘ اسلم شیخ تے قیصر جاوید ورگے سینئر اداکاراں نے زندگی دا وڈا حصا فن دی خدمت وچ لنگھا دِتا پر اوہناں نُوں پرائیڈ آف پرفارمنس نہیں مل سکیا۔ اِک انٹرویو وچ صباء قمر نے کہیا کہ ایہ سارے فنکار چار دہاکیاں توں فن دی خدمت کر رہے نیں پر ایہناں نُوں ہمیشا نظر انداز کیتا گیا۔ میری سدھراے کہ ایہناں ساریاں اداکاراں نُوں اوہناں دی زندگی وچ ای پرائیڈ آف پرفارمنس دِتا جاوے کیوں جے ایہ اوہناں دا حق بندا اے۔ اوہناں نے کہیا کہ میں بلاو جھا کسے دے حق وچ گل کرن دی قایل نہیں پر جہناں دا کم مینوں نظر آندا اے اوہناں لئی میں اَواز بلند کردی رہواں گی۔