ابیات باہو/ سلطان باہوؒ

پڑھ پڑھ علم ملوک رجھاون کیا ہویا اس پڑھیاں ہُو

ہرگز مکھن مول نہ آوے پھٹے دُدھ دے کڑھیاں ہُو

آکھ چنڈورا ہتھے کے آئیو اس انگوری چنیاں ہُو

ہک دِل خستہ رکھیں راضی باہُو لہیں عبادت ورھیاں ہُو

اوکھے لفظاں دے معانی:

رجھاون: خُشی حاصل کرنا

پھٹے: دُدھ دا خراب ہونا

کڑھیاں: دُدھ دا اُبلنا

چنڈورا:اِک پنچھی نوں کہندے،مراد بے عقل

انگوری: بی دے اُگن دی پہلی منزل

## # # #

پڑھ پڑھ عالم کرن تکبر حافظ کرن وڈیائی ہُو

گلیاں دے وچ پھر ن نمانے وتن کتاباں چائی ہُو

جتھے ویکھن چنگا چوکھا اوتھے پڑھن کلام سوائی ہُو

دوہیں جہانیں سوئی مٹھے باہُو جہناں کھادی ویچ کمائی ہُو

اوکھے لفظاں دے معانی:

وڈیائی: بڑائی،عظمت

نمانے: وچارے

چائی:چُکنا،اُٹھانا

سوائی: بُہتا

دوہیں: دونوں

## # # #

چڑھ چناں تے کر رُشنائی ذکر کریندے تارے ہُو

گلیاں دے وچ پھرن نمانے لعلاں دے ونجارے ہُو

شالا مسافر کوئی نہ تھیوے ککھ جہناں توں بھارے ہُو

تاڑی مار اُڈاء ناں باہُو اساں آپے اُڈن ہارے ہُو

مطلب:

نمانے:عاجز

ونجارے : بیوپاری،جوہر شناس

شالا: خدا کرے

## # # #

چڑھ چناں تے کر رُشنائی ذکر کریندے تارے ہُو

تیرے جہے چن کئی سَے چڑھدے سانوں سجناں باجھ ہنیرا ہُو

جتھے چن اساڈا چڑھدا اوتھے قدر نہیں کجھ تیرا ہُو

جس دے کارن اَساں جنم گوایا باہُو یار ملے اِک پھیرا ہُو

## # # #

دین تے دُنیا سکیاں بھیناں تینوں عقل نہیں سمجھیندا ہُو

دوویں اِکس نکاح وچ آون تینوں شرع نہیں فرمیندا ہُو

جِویں اگ تے پانی تھاں اِکے وچ واسا نہیں کریندا ہُو

دوہیں جہانیں مُٹھا باہُو جہڑا دعوا کُوڑ کریندا ہُو

مطلب:

دوہیں:دونوں

واسا: گزارن

اِکس: اِک ای

مُٹھا: محروم

## # # #