پنجاب وچ ترقی دا مُڈھ بجھ گیا اے،ماضی وچ شو بازی ہوندی رہی: وزیر اعلا پنجاب عثمان بزدار ……٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نال وزیر اعلا آفس وچ وفاقی وزیر صاحبزادا محبوب سلطان تے ارکان پنجاب اسمبلی نے ملاقات کیتی۔ ملاقات وچ آپسی دلچسپی دے امور تے سیاسی صورتحال اُتے وچار وٹاندرا کیتا گیا تے ترقیاتی منصوبیاں تے حلقیاں دے مسئلیاں اُتے وی گلبات کیتی گئی۔ وزیر اعلا عثمان بزدار نے ایس موقع اُتے گلبات کردیاں ہویاں کہیا کہ پنجاب دی ترقی دے سفر نُوں رُکن نہیں دواں گے۔ ترقیاتی منصوبیاں وچ ارکان اسمبلی دی مشاورت نُوں اہمیت دِتی جاوے گی۔ پنجاب وچ حقیقی ترقی دے سفر دا اغاز ہو چکیا اے‘ ماضی وچ ترقی نہیں شوبازی ہوندی سی‘ سازشاں کرن والے پہلے وانگوں پچھے رہ جان گے تے وزیراعظم عمران خان دی قیادت وچ نواں پاکستان اگے ودھدا جاوے گا۔ تنقید برائے تنقید کرن والے عناصر شروع دن توں ترقی دے سفر وچ رکاوٹاں کھڑیاں کر رہے نیں۔ ایہناں عناصر نے ذاتی مفاد دی خاطر قومی مفاد نُوں بے پناہ نقصان پہنچایا۔ اوہناں نے کہیا کہ صحت تے تعلیم دے زیر تکمیل منصوبیاں نُوں ترجیحی بنیاداں اُتے مکمل کیتا جاو ے گا۔ جلال پور کینال تے گریٹر تھل کینال ورگے گیم چینجر منصوبے شروع کیتے جا رہے نیں۔ پسماندا علاقیاں دی قسمت بدلنا چاہندے آں‘ ترقی ساریاں دا حق اے۔ پنجاب دا ہر شہر تے کوچا ترقی دے ثمرات توں فیض یاب ہووے گا۔ ملاقات کرن والے اراکین پنجاب اسمبلی وچ رانا شہباز احمد‘ سید عباس شاہ‘ محمد علی قریشی تے صاحبزادا غزین عباسی شامل سن‘ پرنسپل سیکرٹری وزیر اعلا وی ایس موقع اُتے موجود سن۔