کرونا وایرس دے علاج لئی دوائیاں غریب مُلکاں نوں دِتیاں جاون:بل گیٹس ……٭رویل نیوز٭

لندن (نیٹ نیوز) مائیکرو سافٹ دے بانی بل گیٹس دا کہنا اے کہ کرونا وایرس دے علاج لئی دوائیاں تے ویکسینز‘ ایہناں دی بُہتی قیمت ادا کرن والے ملکاں دی بجائے اوہناں ملکاں نُوں دِتی جاوے جہڑے غریب تے لوڑ مند نیں۔ کووڈ 19 کانفرنس نال آن لاین خطاب کردیاں ہویاں بل گیٹس دا کہنا سی کہ جے اسیں دوائیاں تے ویکسینز نُوں لوڑ مند ملکاں دی بجائے اوہناں ملکاں نُوں دواں گے جہڑے ایہناں دی بُہتی بولی لان گے تے سانوں ہور لما تے جان لیوا وباء دا ساہمنا ہووے گا۔ سانوں ایہو جہے لیڈراں دی ضرورت اے جہڑے دوائیاں تے ویکسینز دی منصفانا فراہمی دے مشکل ترین فیصلے کر سکن۔‘ بل گیٹس ولوں کروڑاں ڈالرز دا ایہ تعاون اصل وچ ویکیسن دیاں 30 کروڑ خوراکاں دی ترسیل بارے اے‘ جہدی پہلی کھیپ متوقع طور اُتے 2020 دے آخر تک روانا کیتی جاوے گی۔ ایس سلسلے وچ سیریم انسٹیٹیوٹ آف انڈیا دے نال لائسنس لئی اِک وکھرا معاہدا وی کیتا گیا اے جہدے تحت متوسط تے ایس توں گھٹ آمدن والے ملکاں نُوں 1 ارب ڈوز گھلیاں جان گیاں‘ جد کہ 40 کروڑ ڈوز 2021 توں پہلاں سپلائی کیتیاں جان گیاں۔ بل گیٹس ایس توں پہلاں کرونا وایرس دے خلاف ویکسین تیار کرن لئی فیکٹریاں دی اُساری اُتے ارباں ڈالرز خرچ کرن دا وی اعلان کر چکے نیں۔