منی لانڈرگ بارے  میرے خلاف خبراں بے بنیاد نیں:تحریک انصاف دے آگو حلیم عادل ……٭رویل نیوز٭

کراچی (نمایندا رویل) تحریک انصاف دے آگو حلیم عادل نے کہیا اے کہ نیب دے نوٹس وچ کوئی منی لانڈرنگ دا ذکر نہیں ایس حوالے توں سوشل میڈیا تے اخباراں وچ چھپن والیاں خبراں بے بنیاد نیں‘ 256 ایکڑ زمین دے معاملے وچ کوئی سچائی نہیں‘ میرے ناں اُتے جہڑیاں وی جائیداداں نیں اوہناں دا ریکارڈ میرے کول موجود اے‘ نیب جدوں سدے گا حاضر ہو جاواں گا۔ ایہناں خیالاں دا اظہار اوہناں نے سندھ اسمبلی وچ اپوزیشن لیڈر فردوس شمیم نقوی دے نال پریس کانفرنس کردیاں ہویاں کیتا۔ حلیم عادل شیخ نے کہیا کہ صوبے وچ ہر کم اُتے 52 فیصد رشوت لئی جاندی اے‘ ”آنٹی“ کرپشن نے اینٹی کرپشن نُوں میرے پچھے لا دِتا‘ ایہ نیب وچ ہون تے چھڑی لے کے چلدے نیں جد کہ اسمبلی جاگنگ کردے آندے نیں کوئی وی تحقیقاتی ادارا بلائے تے جانا چاہیدا اے‘ نیب دی پیشی اُتے اسیں ایہ نہیں کہندے کہ بیمار آں۔ حلیم عادل نے ہور کہیا کہ میرے کول زمیناں دی الاٹمنٹ دے سارے دستاویزات موجود نیں‘ انٹی کر/شن وچ 14 مقدمے درج نیں‘ کارروائی نہیں کیتی جاندی‘ میرے ناں صرف 4 ایکڑ زمین اے‘ 1991 وچ 4 ایکڑ زمین اُتے قرض لیا تے پولٹری فارم لایا‘ کراچی دے مضافات وچ ہزاراں ایکڑ زمین لیز اُتے دِتی جاندی سی‘ انٹی کرپشن دی ایف آئی آر نہیں بندی ورنا ہو چکی ہوندی‘ مینوں سلطانا ڈاکو بنا دِتا گیا‘ انٹی کرپشن نے میرے خلاف جھوٹھ دا پلندا بنا دِتا‘ نیب دے کل دے نوٹس وچ منی لانڈرنگ دا ذکر نہیں۔اِک سوال دے جواب وچ اوہناں نے کہیا کہ فشریز وچ اِک ارب 80 کروڑ آیا جو کرپشن دی نذر ہو چکیا اے‘ فشریز وچ 100 فید کرپشن ہو رہی اے‘ اج فشریز دی صور تحال نثار مورائی توں وی ودھ خراب اے۔ ایس موقع اُتے پی ٹی آئی آگو فردوس شمیم نقوی نے کراچی وچ نیوز کانفرنس نال خطاب کردیاں ہویاں کہیا کہ سندھ سرکار دے خلاف نیب وچ اپیل کرن جا رہے آں‘ صوبائی حکومت دی بدعنوانی بے نقاب کردے رہے آں‘ کرپشن کرن والیاں دی تحریک انصاف وچ کوئی گنجایش نہیں‘ پی ٹی آئی اوہ جماعت نہیں جہڑی کہوے مینوں کیوں کڈھیا‘ پی ٹی آئی لیڈر دا اعلان اے کرپشن کرن والا پارٹی وچ نہیں رہوے گا‘ حالے کل اِک آڈیو لیک ہوئی جہدے اُتے فوری ایکشن لیا گیا‘ ساڈے وِچوں کوئی مسٹر 10 پرسنٹ نہیں اے‘ سندھ حکومت نُوں بے نقاب کرن اُتے ایہ حلیم عادل دے دشمن بن گئے‘ نیب نُوں کسے نے شکایتاں گھلیاں جہدے اُتے نیب نے افسراں توں معلومات لین لئی لیٹر کڈھیا اے تے اوہدے اُتے میڈیا اُتے وکھایا جا رہیا اے کہ حلیم عادل شیخ نیب دے ریڈار اُتے نیں‘ گھیرا تنگ ہو گیا‘ تباہی آن والی اے‘ پیپلز پارٹی والے حلیم عادل شیخ دی اواز نَپنا چاہندے نیں۔