فیض احمد فیض ہوراں دی اِک نظم ـــــــ٭رویل٭

رَبّا سچیا تُوں تے آکھیا سی

جا اوئے بندیا جگ دا شاہ ایں توں

ساڈیاں نعمتاں تیریاں دولتاں نیں

ساڈا نیب تے عالی جاہ ایں توں

ایس لارے تے ٹور کد پُچھیا ای

کیہ ایس نمانے تے بیتیاں نیں

کدی سار وی لئی اُو رب سائیاں

تیرے شاہ نال جگ کیہ کیتیاں نیں

کِتے دھونس دھتکار سرکار دی اے

کِتے دھاندلی مال پٹوار دی اے

ایویں وِچ ہڈاں کلپے جان میری

جویں پھاہی وِچ کُونج کُرلاوندی اے

چنگا شاہ بنایا ای رب سائیاں

پولے کھاندیاں وار نہیں آؤندی اے

مینوں شاہی نہیں چاہی دی رب میرے

میں تےعزتاں دا ٹکّر منگناں واں

مینوں تانگھ نہیں محلاں ماڑیاں دی

میں تے جیونے دی نُکّر منگناں واں

میریاں منّیں تے تیریاں میں منّاں

تیری سونہ جے اِک وی گل موڑاں

جے ایہ منگ نہیں پُجدی تَیں ربّا

فیر میں جاواں تے رب کوئی ہور لوڑاں

*****