kraamaat@gmail.com
+ +92 333-430-6384


بھارتی قبضے دے خلاف کشمیریاں دی جدوجہد نُوں سلام پیش کردا آں:وزیراعظم عمران خان ……٭رویل نیوز٭


نمائندا رویل July 14, 2020


اسلام آباد (نمایندا رویل) وزیراعظم عمران خان نے کہیا اے کہ پاکستان مقبوضا کشمیر دی بھارت توں ازادی تک کشمیریاں دی جایز جدوجہد دی حمایت جاری رکھے گا۔ شہدائے کشمیر دیہاڑ اُتے جاری بیان وچ وزیراعظم عمران خان نے کہیا کہ پاکستان کشمیریاں دے استصواب راء دے حق لئی ثابت قدمی نال کھلوتا اے تے پاکستان مقبوضا کشمیر دی بھارت توں ازادی تک کشمیریاں دی جائز جدوجہد دی حمایت جاری رکھے گا۔ اوہناں نے کہیا کہ مقبوضا کشمیر دی ازادی دا دن دور نہیں‘ کشمیریاں دے اباؤ اجداد نسل در نسل توں ازادی لئی جاناں قربان کردے آئے نیں‘ اج کشمیری جرات نال ہندوتوا اُچیرتا دے خلاف جدوجہد کر رہے نیں‘ ہندوتوا اُچیرتا دا مقصد ابادی وچ تناسب تبدیل کر کے کشمیریاں دا صفایا کرنا اے۔ وزیراعظم دا کہنا سی کہ ہندوتوا اُچیرتا دا مقصد کشمیریاں دی شناخت مٹانا اے‘ شہدائے کشمیر دیہاڑ اُتے بھارتی قبضے دے خلاف کشمیریاں دی جدوجہد نُوں سلام پیش کردا آں‘ موجودا کشمیری مزاحمت 13 جولائی 1931 دے شہداء دی جدوجہد دا تسلسل اے۔ دوجے پاسے پاکستان مسلم لیگ ن دے صدر تے قائد حزب اختلاف شہباز شریف نے شہدائے کشمیر دیہاڑ اُتے شہدائے جموں و کشمیر نُوں زبردست خراج عقیدت پیش کردیاں ہویاں کہیا کہ انگیرز سامراج دی اگوائی وچ ڈوگرا فوج دے خلاف سری نگر سینٹرل جیل دے باہر جام شہادت نوش کرن والیاں دا ناں تواریخ دے سنہری حرفاں وچ درج اے‘ کشمیریاں نے ثابت کیتا کہ قرآن کریم تے اسلام دی عزت و حرمت اوہناں نُوں اپنی جان توں پیاری اے۔ اپنے بیان وچ اوہناں نے کہیا کہ 22 مسلماناں دا جان قربان کر کے اذان مکمل کرنا واضح پیغام اے کہ ایہناں نُوں شکست دِتی جا سکدی اے تے نہ جھُکایا جا سکدا اے‘ شہدائے کشمیر دی پکار بھارت توں ازادی دی تحریک دی صورت وچ مقبوضا جموں و کشمیر وچ اج وی پوری قوت نال گونج رہی اے ایس لئی بھارت کسے غلط فہمی وچ نہ رہوے‘ مقبوضا جموں و کشمیر مسلم اکثریت خطا اے تے انشاء اللہ ہمیشا رہوے گا‘ بھارت دے ظلم تے جبر وچ 5 اگست 2019 توں اِک نویں شدت آئی اے جہڑی انتہائی مذمت جوگ اے‘ تشدد وچ شدت دے باوجود 5 اگست دے باوجود‘ ہر عمر دا کشمیری اپنے لہو نال مودی دے فاشزم نُوں چیلنج کر رہیا اے‘ ایہو کشمیری مستقبل دی امید نیں۔ اوہناں نے کہیا کہ عالمی برادری‘ اقوام متحدا تے سلامتی کونسل توں کشمیری سوال پُچھ رہے نیں کہ اوہناں نُوں انصاف کدوں ملے گا‘ جموں و کشمیر دے رہن والیاں نُوں سلام اے جہناں نے ازادی لئی ہر ظلم‘ مصیبت دا عزم و ہمت نال مقابلا کیتا تے ہر سازش نُوں ناکام بنایا۔