عمران خان تے پاکستان تحریک انصاف دی حکومت نے کشمیریاں نُوں یتیم تے لاوارث چھڈ دِتا:بلاول بھٹو زرداری ……٭رویل نیوز٭

کراچی (نمایندا رویل) پاکستان پیپلز پارٹی دے چیئرمین بلاول بھٹو زرداری نے کہیا اے کہ عمران خان دا وزیراعظم رہنا جمہوریت تے معیشت سنے ہر پاکستانی دی زندگی لئی خطرا اے‘ عمران خان تے پاکستان تحریک انصاف دی حکومت نے کشمیریاں نُوں یتیم تے لاوارث چھڈ دِتا اے‘ وزیراعظم نے مودی دی الیکشن مہم دے دوران اوہدی حمایت کیتی‘ بلین ٹری سونامی‘ مالم جبا پولیو‘ حج معاملات تے فارن فنڈنگ کیس وچ وی کرپشن ہوئی پر نیب چُپ اے‘ جہانگیر ترین وی نَس گیا‘ ایہناں دی نا اہلی تے کرپشن دی وجھا توں پی آئی اے جہاز بیرون ملک نہیں جا سکدا‘ شوگر تے آٹے دی کرپشن اُتے ”سلیکٹڈ نُوں وی جواب دینا پوے گا‘ نیب وفاقی کرپشن نُوں سہولت دے رہیا اے جد کہ سندھ دا وزیر اعلا ہر ہفتے اسلام آباد وچ پیشی بھگتدا اے۔ کراچی وچ پیپلز پارٹی دے ہور آگوواں نال پریس کانفرنس کردیاں ہویاں بلاول بھٹو زرداری نے کہیا کہ پاکستان پیپلز پارٹی نے ہمیشا کشمیر کاز وچ صف اول دا کردار ادا کیتا اے‘ شہید ذوالفقار علی بھٹو نے ہر فورم اُتے کشمیریاں دا مقدما لڑیا تے اج وی اوہناں دیاں تقریراں نُوں پاکستان تے کشمیر دی لوکائی یاد کردی اے جدوں شہید ذوالفقار علی بھٹو احتجاج دی کال دیندے سن تے صرف ازاد کشمیر ای نہیں سگوں پورا مقبوضا کشمیر وی احتجاج وچ ساتھ دیندا سی کیوں جے اوہناں نُوں پورا اعتماد سی کہ پاکستان دی قیادت تے پاکستان دی لوکائی کشمیریاں دے نال شانا بشانا کھلوتے نیں۔ شہید محترما بے نظیر بھٹو نے ہر فورم اُتے ہر موقع اُتے کشمیریاں دی اواز چُکی تے اج وی پیپلز پارٹی نے اوی سلسلا جاری رکھیا اے۔ اوہناں نے کہیا کہ پاکستان دی اپوزیشن ہووے یاں حکومت وچ کلا سیاستدان آں جہنے پہلے دن توں مودی دی مخالفت کیتی اے‘ پیپلز پارٹی پہلے دن توں مودی دی مخالفت کر رہی اے تے اگے جا کے وی کراں گے‘ عمران خان تے پاکستان تحریک انصاف دی حکومت نے کشمیریاں نُوں یتیم تے لاوارث چھڈ دِتا اے‘ اوہ وی ریکارڈ دا حصا اے‘ عمران خان پاکستان دے پہلے تے آخری وزیراعظم نیں جہناں نے پاسکتان دی لوکائی نُوں کشمیر اُتے متحد نہیں کیتا‘ جہڑی وی حکومت ہووے آمر‘ جمہوری‘ سلیکٹڈ‘کٹھ پتلی یاں منتخب جدوں وی کشمیر دا مسئلا آندا سی تے اسیں سارے اکٹھے ہوندے ساں پر ایہ نالایق وزیراعظم کشمیر کاز اُتے وی ایکا قایم کرن وچ ناکام ہو گئے نیں ایہ اوہ وزیراعظم نیں جہناں نے مودی دی الیکشن مہم دے دوران اوہدی حمایت کیتی سی تے کہیا سی کہ مودی جتے گا تے کشمیر کاز حل ہو جاوے گا تے جویں ایہ حل ہو رہیا اے پورے پاکستان دے ساہمنے اے‘ ایہدے اُتے حیران آں کہ ساڈے کشمیریاں نُوں لاوارث چھڈن‘ مودی دی حمایت دے باوجود قومی اسمبلی وچ کھلو کے کہندے نیں کہ پاکستان دی خارجا پالیسی عمران خان دی خارجا پالیسی سبھ توں کامیاب رہی اے۔ بلاول بھٹو نے کہیا کہ ہر پاکستانی اپنے کشمیریاں دے شانا بشانا کھلوتے نیں‘ کشمیر دی لوکائی کرونا توں پہلے لاک ڈاؤن وچ اے اوہناں دے نال جہڑیاں نا انصافیاں ہو رہیاں نیں اوہناں اُتے گل کرنا ساڈا فرض اے‘ پی ٹی آئی نے پاکستان دی خارجا پالیسی نُوں سبھ توں ودھ نقصان پہنچایا اے تے ہُف ساڈی معیشت تے جمہوریت نُوں نقصان پہنچا رہے نیں‘ اوہ ہُن ایس نکتے اُتے پہنچ چکے نیں کہ عمران خان دا وزیراعظم رہنا نہ صرف ساڈی جمہوریت‘ معیشت سگوں ہر پاکستانی دی زندگی لئی خطرا بن چُکیا اے۔ چیئرمین پیپلز پارٹی نے کہیا کہ پاکستانی تواریخ وچ پہلی وار شرح نمو منفی ہوئی اے تے بیروزگار بندیاں دی گنتی وچ ریکارڈ وادھا ہو رہیا اے جو ہور ہووے گا‘ بجٹ وچ مزدور‘ محنت کش تے کرونا دا فرنٹ لاین اُتے مقابلا کرن والیاں سنے ٹڈی دل دا مقابلا کرن لئی وی کجھ نہیں رکھیا گیا۔ ساڈی صوبائی حکومت بیروزگار بندیاں لئی فوڈ سیکیورٹی پروگرام شروع کیتا اے‘ حکومت سندھ نے اپنے بجٹ وچ پہلی وار کوئی سکیم متعارف نہیں کروائی۔ اوہناں نے الزام لایا کہ پورے پنجاب وچ کرپشن ہو رہی اے پر میدیا ایہنوں رپورٹ نہیں کردا۔ اوہناں دا کہنا سی کہ جے احتساب دا نظام موجودا اے تے سبھ لئی اِکو جہیا ہونا چاہیدا اے‘ بی آر ٹی اُتے سٹے کیوں اے؟ ایہ دُہرا معیار اے بی آر ٹی اُتے سٹے ختم کیتا جاوے۔