کیہ 20 شوگر ملز اسمان توں لتھیاں نیں جو اوہناں دے خلاف کارروائی نہیں ہو سکدی، حکومت نُوں شوگر ملز خلاف کارروائی دی اجازت……٭رویل نیوز٭

اسلام آباد (نمایندا رویل) سپریم کورٹ نے حکومت نُوں شوگر ملز خلاف کارروائی دی اجازت دین سنے حکومتی شوگر کمیشن دے خلاف سندھ ہائیکورٹ دا حکم امتناع خارج متھدیاں ہویاں حکومت تے اداریاں نُوں قانون دے مطابق کارروائی دی اجازت دے دِتی اے۔ کیس دی سنوائی چیف جسٹس دی اگوائی وچ 3 رکنی بینچ نے کیتی۔ سنوائی دوران اٹارنی جنرل نے عدالت نُوں دَسیا کہ ایہ پہلا کمیشن اے جہدے وچ 2 وزرائے اعلا پیش ہوئے‘ وزیراعظم دے نیڑلے ترین سنگی نُوں وی کمیشن وچ پیش ہونا پیا‘ کیہ 20 شوگر ملز اسمان توں لتھیاں نیں جو اوہناں دے خلاف کارروائی نہیں ہو سکدی‘ حکومت کھنڈ دے بعد پٹرولیم بحران اُتے وی کمیشن بنا رہی اے‘ سندھ ہائیکورٹ نے جس طرحاں کارروائی توں روکیا اوہ قانون دے خلاف اے‘ شوگر ملز دے وکیل مخدوم علی خان نے مؤقف اپنایا کہ حکومتی وزراء بیان بازی کر کے میڈیا ٹرایل کردے نیں‘ حکم امتناع خارج ہویا تے ہائیکورٹس وچ کیس متاثر ہووے گا۔ چیف جسٹس نے ریمارکس دیندیاں ہویاں کہیا کہ بیان بازی سیاسی معاملا اے‘ بُہتی مداخلت نہیں کر سکدے‘ نہ ای عدالت حکومت نُوں کم کرن توں روک سکدی اے۔ جسٹس اعجاز الاحسن نے اِک موقع اُتے کہیا کہ شفاف کم ہونا چاہیدا اے تاں جے ملوث بندے کیفر کردار تک پہنچ سکن‘ تکنیکی معاملیاں وچ لوکائی دا مفاد پچھے نہیں رہن دواں گے۔ عدالت نے شوگر کمیشن رپورٹ اُتے حکومتی عہدیداراں نُوں بیان بازی توں روکدیاں ہویاں سندھ تے اسلام آباد ہائیکورٹ نُوں 3 ہفتیاں وچ شوگر ملز دیاں درخاستاں اُتے فیصلا دین سنے حکومت نُوں شوگر ملز خلاف کارروائی دی اجازت دیندیاں ہویاں کیس نبیڑ دِتا۔