صوبائی فنانس کمیشن بنان دی منظوری دے دِتی، معاملات نُوں سپریم کورٹ لے جان بارے وی کابینا نُوں اعتماد وچ لیا گیا……٭رویل نیوز٭

اسلام آباد (نمایندا رویل) وفاقی کابینا نے این ایف سی ایوارڈ دے متبادل دے طور اُتے صوبائی فنانس کمیشن بنان دی منظوری دے دِتی اے‘ کابینا نے سرکاری ملازماں نُوں پنشن دیاں ادائیگیاں وچ اوکڑاں ختم کرن لئی پنشن فنڈ قایم کرن دی وی منظوری دے دِتی‘ بیرون ملک وچ قید پاکستانیاں دی رہائی لئی اوہناں نُوں مکمل قانونی معاونت فراہم کرن تے ایہناں ملکاں توں انسانی ہمدردی دی بنیاد اُتے پاکستانیاں نُوں رہا کرن لئی سارے سفارتخانیاں نُوں ہدایتاں جاری کر دِتیاں گئیاں نیں۔وفاقی کابینا نے کے الیکٹرک دی بجلی تے گیس دیاں قیمتاں وچ وادھے دا معاملا مؤخر کر دِتا‘ پورے ملک وچ ہوٹلز تے شادی ہالز کھولن دا معاملا وفاقی وزیر اسد عمر دے حوالے جد کہ ڈی جی ایکریڈیشن کونسل تے ڈی جی نیشنل انسٹیٹیوٹ آف الیکٹرانکس دی تعیناتی دی وی منظوری دے دِتی گئی۔ منگل والے دن وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ کئی وزیراں نے ویڈیو لنک راہیں رلت کیتی‘ اجلاس وچ 5 نکاتی ایجنڈے اُتے غور کیتا گیا جد کہ اجلاس وچ ملک دی مجموعی سیاسی تے معاشی صورتحال سنے کرونا وباء خلاف اقدامات دا جایزا لیا گیا جد کہ کے الیکٹرک تے عزیر بلوچ بارے جے آئی ٹی دے امور وی بحث ہیٹھ آئے۔ وسیلیاں مطابق وفاقی کابینا نے کے الیکٹرک دی بجلی دی قیمت وچ وادھے دے علاوا سارے ایجنڈے دی منظوری دے دِتی اے۔ اجلاس وچ کے الیکٹرک دی بجلی دی قیمت وچ وادھے دی سمری مؤخر کر دِتی گئی اے‘ اجلاس وچ کابینا دے فیصلیاں اُتے عملدرآمد‘ کرونا وایرس دی مجموعی صورتحال‘ ملکی سیاسی‘ معاشی تے پارلیمانی امور اُتے بریفنگ دِتی گئی‘ وفاقی کابینا نُوں جنور منڈیاں تے احتیاطی تدبیراں بارے وی اگاہ کیتا گیا جد کہ اجلاس وچ سمار لاک ڈاؤن دی حکمت عملی نتیجے اُتے وی مشاورت کیتی گئی‘ وزیراعظم تے کابینا ارکان نے کرونا کیسز وچ کمی اُتے اطمینان دا اظہار کیتا‘ کابینا نے کے الیکٹرک ولوں بجلی قیمتاں وچ وادھے دے فیصلے دی توثیق نہیں کیتی‘ گیس دیاں قیمتاں وچ 73 ارب رُپئے دا وادھو بھار پان دا معاملا مؤخر کر دِتا۔اجلاس وچ وفاقی وزیر ریلوے شیخ رشید نے ہوٹلاں تے مارکیٹاں کھولن دا معاملا وی چُکیا تے کہیا کہ سارے کاروبار کھل چکے نیں پر ایہناں نُوں حالے تک نہیں کھولیا گیا جہدے اُتے وزیراعظم نے معاملا مشاورت لئی این سی او سی نُوں گھل دِتا تے وفاقی وزیر اسد عمر نُوں ہدایت کیتی کہ ہوٹل تے مارکیٹاں کھولن دے معاملے نُوں سنجیدگی نال ویکھن تے چھیتی توں چھیتی ایس توں اگاہ کرن۔ وفاقی وزیر علی زیدی نے عزیر بلوچ تے جے آئی ٹی رپورٹ اُتے وفاقی کابینا نُوں تفصیلی بریفنگ دِتی جد کہ معاملات نُوں سپریم کورٹ لے جان بارے وی کابینا نُوں اعتماد وچ لیا۔ وزیراعظم نے اجلاس نال خطاب کردیاں ہویاں کہیا کہ کرونا ختم نہیں ہویا‘ حالے ہور احتیاط ورتنی پوے گی‘ وڈی عید اُتے شہری احتیاط کرن‘ گھراں تک محدود رہنا بُہتا مناسب ہووے گا‘ وزیراعظم نے جنور منڈیاں وچ ہر صورت ایس او پیز اُتے عملدرآمد دی ہدایت دے دِتی۔ وفاقی کابینا نے عرفان احمد ربانی نُوں ڈائریکٹر جنرل نیشنل انسٹیٹیوٹ آف الیکٹرونکس تے عصمت گل خٹک نُوں ڈائریکٹر جنرل نیشنل ایکریڈیٹیشن کونسل تعینات کرن دی وی منظوری دِتی۔