جوان پروگرام دے دوجے مرحلے وچ قرضے دی ودھ توں ودھ حد 50 لکھ توں ودھا کے ڈھائی کروڑ کر دِتی گئی،وزیر اعظم ولوں منظوری……٭رویل نیوز٭

اسلام آباد (نمایندا رویل) وزیراعظم عمران خان نے کامیاب جوان پروگرام دا دوجا مرحلا فوری شروع کرن دی منظوری دے دِتی اے۔ منگل والے دن وزیراعظم ہاؤس وچ وزیراعظم عمران خان نال معاون خصوصی عثمان ڈار نے ملاقات کیتی تے جوان پروگرام دے دوجے مرحلے اُتے تفصیلی بریفنگ دِتی‘ وزیراعظم نے عثمان ڈار دیاں کاوشاں نُوں کراج تحسین پیش کیتا تے نویں پروگرام نُوں فوری شروع کرن لئی منظوری دے دِتی۔ وزیراعظم دے معاون خصوصی عثمان ڈار نے کہیا کہ نوجوان اپنے کاروبار لئی 1 لکھ توں ڈھائی کروڑ تک دا قرض لے سکن گے‘ فیصلا کرونا دے کارن معیشت نُوں درپیش چیلنجز دے پیش نظر کیتا گیا‘ جہڑے نوجوان مالی اوکڑاں دا شکار نیں اوہ ایس پروگرام توں بھرواں فایدا چُکن‘ نوجوان صرف کاروبار دا منصوبا بنان‘ حکومت بغیر گارنٹی دے قرض دیوے گی‘ بغیر گارنی قرض دی حد وی 5 لکھ توں ودھا کے 10 لکھ کر دِتی گئی اے۔ دوجے فیز وچ نوجواناں دا دیرینا مطالبا وی پورا کر دِتا اے‘ پورے ملک دے سارے اسلامی بینک وی پروگرام وچ شامل ہون گے۔ دوجے پاسے ایس حوالے توں حکومت دی ہدایت اُتے سٹیٹ بینک آف پاکستان نے سارے کمرشل بینکاں نُوں چٹھی جاری کر دِتی اے جہدے مطابق قرض اُتے مارک اپ وچ وی زبردست کمی کر دِتی گئی اے‘ دوجے مرحلے لئی مارک اپ 6 توں گھٹ کر کے 3 فیصد کر دِتا گیا‘ جوان پروگرام دے دوجے مرحلے وچ قرضے دی ودھ توں ودھ حد 50 لکھ توں ودھا کے ڈھائی کروڑ کر دِتی گئی اے۔