وزیراعظم عمران خان دے خلاف ریفرنس لئی درخاست  مسلم لیگ (ن) دے کہڑے آگو نے جمع کروائی؟……٭رویل نیوز٭

اسلام آباد (نمایندا رویل) پاکستان مسلم لیگ (ن) دے آگو احسن اقبال نے قومی احتساب بیورو (نیب) وچ وزیراعظم عمران خان دے خلاف ریفرنس لئی درخاست دایر کر دِتی اے۔ اسلام آبادوچ احتساب کورٹ دے باہر صحافیاں نال گلبات کردیاں ہویاں اوہناں نے کہیا کہ نارووال سپورٹس سٹی دے بارے وچ الزام لایا کہ بین الاقوامی بارڈر توں 800میٹر دے فاصلے اُتے منصوبا شروع کیتا گیا جد کہ ایہ ڈیفنس سوسایٹی توں وی بُہتا دور اے‘ نیب نے جدوں مینوں گرفتار کیتا تے اوہناں نے جج دے ساہمنے منیا کہ میرے اُتے کوئی بدعنوانی دا الزام نہیں سگوں اختیارات دے غلط استعمال دا الزام اے‘ نیب نے الزام لایا کہ کھیڈ صوبائی دایرا اختیار وچ آندا اے تے میں پی ایس ڈی پی وچ ایہ منصوبا کیوں پایا‘ میں سوال کردا آں کہ ایس سال پی ٹی آئی حکومت نے یونین کونسل دی سطح دے منصوبے پی ایس ڈی پی وچ شامل کیتے نیں نیب اوہناں نُوں کیوں نہیں پھڑ رہی۔ اوہناں نے کہیا کہ بھونڈے مقدمے وچ انتقامی کارروائی دا نشانا بنا کے میری کردار کشی کیتی گئی تے بین الاقوامی طرز دے منصوبے نُوں تباہ و برباد کر دِتا گیا۔ اوہناں نے دَسیا کہ 2020 وچ نجم سیٹھی نے نارووال سپورٹ سٹی وچ پی ایس ایل میچ دے انعقاد دا وعدا کیتا سی‘ اوہناں نے کہیا کہ سپورٹس سٹی منصوبے دی 86 فیصد فنڈنگ ہو چکی سی پر عمران خان نے آندیاں ای ایس منصوبے دی فی الفور روک دِتی جہڑی صرف 14 فیصد باقی رہ گئی سی جہدی وجھا توں وڈی گنتی وچ درآمد شدا سامان ضایع ہو گیا جے نوجوان کھڈاریاں نُوں بین الاقوامی معیار دی سہولت فراہم کرنا جرم اے ت ایس منصوبے نُوں اجاڑنا ایس توں وی سنگین جرم اے‘ عمران خان دیو جھا توں ارباں دا نقصان ایس غریب ملک نُوں برداشت کرنا پوے گا جہد ے لئی میں نیب چیئرمین نُوں درخاست دِتی اے کہ اوہ ایس حوالے توں تحقیقات کرن۔ اوہناں نے کہیا کہ نیب جو مسلم لیگ (ن) دے آگوواں نُوں عمران خان دے فرمایشی پروگرام اُتے گرفتار کر رہیا اے‘ اوہناں نُوں پی ٹی آئی دی کرپشن نظر نہیں آندی‘ نیب جہڑا ساڈیاں ضمانتاں دے خلاف اپیل کرن لئی 2 گھنٹیاں وچ اجلاس سَد لیا اے ایہنوں بی آر ٹی پشاور منصوبا نظر نہیں آندا‘ اوہناں نے دعوا کیتا کہ بلیک لسٹڈ کمپنیاں نُوں لاہور تے اسلام آباد وچ من پسند ٹھیکیاں نال نوازیا جا رہیا اے‘ نیب نُوں ایہ کیوں وکھائی نہیں دیندا عمران خان توں مطالبا کردا آں کہ جے تُسیں دیانتداری دے اینے چیمپین او تے چیئرمین نیب نُوں خط لکھو تے کہوو میں اپنی کابینا نُوں اپنے سنے احتساب لئی پیش کردا آں‘ عمران خان کرپشن دی چھتری بن چُکے نیں جہدے تھلے ساریاں نُوں تحفظ حاصل اے‘ پی ٹی آئی دے انتقامی ایجنڈے نے پاکستان نُوں بدترین فیصلا سازی دے بحران وچ سُٹ دِتا اے۔ اِک سوال دے جواب وچ اوہناں نے کہیا کہ کسے دفتر وچ کوئی افسر فیصلا کرن دی جرات نہیں رکھدا کیوں جے اوہ اپنے پینشن دے پیسے نال عدالت دے کر لان دی ہمت نہیں نہیں رکھدے نیب آپ کہندا اے اسیں چہرا نہیں ویکھدے کیس ویکھدے آں‘ میں اج ایہدے ساہمنے کیس پیش کیتا اے تے امید کردا آں کہ چیئرمین نیب ایہدا نوٹس لین گے۔