تعلیمی اداریاں وچ کھیڈاں دے نظام نُوں بہتر بنائے بغیر ملک وچ کھیڈ ترقی نہیں کر سکدے: قومی بیڈمنٹن کوچ……٭رویل نیوز٭

اسلام آباد (نمایندا رویل) قومی بیڈمنٹن ہیڈ کوچ لیاقت علی نے کہیا اے کہ تعلیمی اداریاں وچ کھیڈاں دے نظام نُوں بہتر بنایا بغیر ملک وچ کھیڈ ترقی نہیں کر سکدے‘ اِک انٹرویو وچ اوہناں نے کہیا کہ گراس روٹ سطح اُتے بیڈمنٹن دے کھیڈ لئی تعلیمی اداریاں وچ 12 توں 14 سال دی عمر دے بوائز تے گرلز کھڈاریاں نُوں کھیڈاں دی تربیت دینا ضروری اے جہدے نال اوہ چھیتی سکھ سکدے نیں تے ایس عمر وچ بچیاں وچ سکھن دی دماغی صلاحیت بُہتی ہوندی اے۔ اوہناں نے کہیا کہ بچیاں دی ودھوتری نُوں ودھان لئی کھیڈاں بہت ضروری نیں جہدے نال اِک صحت مند معاشرا جنم لیندا اے۔ اوہناں نے پڑھیار تے پڑھیارناں اُتے زور دیندیاں ہویاں کہیا کہ ایہناں نُوں تعلیمی سرگرمیاں دے نال نال کھیڈاں دیاں سرگرمیاں وچ وی ودھ چڑھ کے حصا لینا چاہیدا اے۔