امریکی شہری سنتھیا ڈی رچی نُوں کلین چٹ   ……٭رویل نیوز٭

اسلام آباد (نمایندا رویل) وزارت داخلا دا امریکی شہری سنتھیا ڈی رچی نوں ڈی پورٹ نہ کرن دا فیصلا‘ وزارت داخلا نے فیصلے دی کاپی اسلام آباد ہائیکورٹ وچ جمع کروا دِتی۔ وزارت داخلا نے اپنے فیصلے وچ لکھیا کہ سیکیورٹی اداریاں دی رپورٹ مطابق سنتھیا غیر قانونی‘ ریاست خلاف سرگرمیاں وچ ملوث نہیں پائے گئے‘ وزارت داخلا نے امریکی شہری سنتھیا ڈی رچی نُوں کلین چٹ دے دِتی۔ چیف جسٹس اسلام آباد ہایکورٹ جسٹس اطہر من اللہ نے امریکی سوانی شہری سنتھیا ڈی رچی نُوں ملک بدر کرن لئی پیپلز پارٹی دی درخاست اُتے سنوائی کیتی۔ وزارت داخلا نے اسلام آباد ہائیکورٹ وچ سنتھیا نُوں ڈی پورٹ کرن بارے رپورٹ جمع کروا دِتی‘ جہدے وچ وزارت داخلا نے سنتھیا ڈی رچی نُوں کلین چٹ دیندیاں ہویاں اوہناں دا ویزا 31 اگست تک درست متھ دِتا۔ رپورٹ دے مطابق سنتھیا غیر قانونی تے ریاست خلاف سرگرمیاں وچ ملوث نہیں نیں‘ غیر ملکیاں دے ویزیاں وچ 31 اگست تک وادھا کیتا گیا سی‘ ایس لئی سنتھیا رچی 31 اگست تک قانون دے مطابق پاکستان وچ رہ سکدے نیں۔ سنتھیا رچی نے ویزے وچ وادھے دی وکھر ی درخاست وی دے رکھی اے‘ 31 اگست دے بعد ویزے وچ وادھے دی درخاست اُتے قانون دے مطابق فیصلا کیتا جاوے گا۔ اسلام آباد ہائیکورٹ نے وزارت داخلا نُوں فیصلے دی کاپی فریقین نُوں فراہم کرن دی ہدایت کردیاں ہویاں سنوائی ملتوی کر دِتی۔