مائنس ون خاہشاں اُتے نہیں ہوندا‘ نواز شریف چھیتی ای احتساب عدالت وچ  آن گے،سزاواں دا فیصلا عدالتاں نے کرنا اے: شہزاد اکبر……٭رویل نیوز٭

اسلام آباد (نمایندا رویل) وزیراعظم پاکستان دے معاون خصوصی برائے احتساب شہزاد اکبر نے کہیا اے کہ مائنس ون وفاق تے نہ ای پنجاب وچ ہووے گا کیوں جے مائنس ون خاہشاں اُتے نہیں ہوندا‘ شوگر انکوایری رپورٹ دے مطابق پاکستان سرکار ثبوت دے نال ایہ کیسز نیب نُوں گھل رہی اے۔ شوگر انکوایری کمیٹی دی فائنڈنگ دے نال ایہ رپورٹ مسابقتی کمیشن‘ ایف آئی اے تے سٹیٹ بینک آف پاکستان نُوں وی گھل رہے آں کہ اوہ کمکیشن دی فائنڈنگ دے مطابق تحقیقات کرن۔ اوہناں نے کہیا کہ نواز شریف ایس ویلے مفرور نیں‘ احتساب جج ارشد ملک دی برطرفی اُتے اوہناں ولوں دِتی گئیاں سزاواں دا فیصلا عدالتاں نے کرنا اے‘ جہڑا وی فیصلا عدالتاں کرن گیاں اسیں اوہناں نُوں منن دے پابند آں۔ ایہناں خیالاں دا اظہار اوہناں نے پی آئی ڈی اسلام آباد وچ اِک پریس کانفرنس دے دوران کیتا۔ اوہناں نے ایہ وی کہیا کہ آٹا بحران اُتے وزیراعظم پاکستان دیاں ہدایتاں اُتے اِک انکوایری کمیشن مقرر کیتا گیا سی جہنے اپنیاں فائنڈنگ دِتیاں نیں کہ 2018 دے رمضان پیکج وچ دِتی جان والی سبسڈی اُتے کویں فلور ملز مالکان نے فراڈ کیتا تے ایہدے وچ سرکاری ملازمین وی شامل سن۔ 2018 وچ 667 فلور ملز مالکان نُوں سبسڈی دِتی گئی ایہناں وِچوں 149 فلور ملز مالکان خرد برد وچ ملوث پائے گئے۔ ایہناں مالکان نے کنک لے کے گھٹ پسوائی کیتی۔ ایس سبسڈی وچ 254 ملین دی خرد برد دی نشاندہی کیتی گئی۔ ایہناں وِچوں اینٹی کرپشن پنجاب نے 190 ملین دی رقم ریکور کر لئی۔ ایہ ممکن نہیں کہ فلور ملز مالکان سرکاری ملازماں دی ملی بھگت دے بغیر فراڈ کر سکن۔ 156 سرکاری ملازمین ایس ملی بھگت وچ برابر دے شریک پائے گئے‘ ایہناں دے خلاف ای محکما نا کارروائی دی واری اے۔ اوہناں نے ایہ وی کہیا کہ پاکستان دی تواریخ وچ پہلی وار وزیراعظم نے اِک انکوایری کمیشن بنایا تے اوہناں نے ازادانا انکوایری کیتی جہدے وچ حکومت دے لوک وی ملوث پائے گئے۔ انکوایری کمیٹی دی رپورٹ نُوں پبلک کیتا گیا‘ رپورٹ پبلک ہوئی تے شوگر مالکان عدالتاں وچ چلے گئے تے ایہدے اُتے حکم امتناع لے لیا۔ سندھ نال تعلق رکھن والے شوگر ملز مالکان سندھ ہائیکورٹ چلے گئے ہُن جدوں سپریم کورٹ نے فیصلا دِتا اے کہ فراڈ وچ ملوث ملزماں خلاف حکومت ایکشن لے سکدی اے تے اسیں سپریم کورٹ دیاں ہدایتاں دے مطابق ایہناں مالکان خلاف نیب‘ ایف آئی اے‘ سٹیٹ بینک تے دوجے اداریاں وچ جا رہے آں۔ جہڑے 90 دن دے اندر اپنی تحقیقات مکمل کر لے حتمی رپورٹ پیش کرن گے۔ کھنڈ دی وڈی کھیپ جعلی برآمد کیتی گئی اوہ ٹرک جہڑے 20`25 ٹن توں ودھ وزن نہیں چُک سکدا اوہ کس طرحاں 80 توں 90 ٹن وزن لے کے افغانستان گیا۔ ایہدے اُتے وی ایف آئی اے نُوں ثبوت دے نال کیس دِتا گیا کہ اوہ تحقیقات کرن۔ اوہناں نے ہور کہیا کہ موجودا حکومت دے منشور وچ شامل اے کہ احتساب کیتا جاوے گا تے اسیں ایہدے اُتے تیزی نال کم کر رہے آں۔ معاون خصوصی دا کہنا سی کہ وزیراعظم آٹے بارے روزانا دی بنیاد اُتے اجلاس دی صدارت کردے نی۔