خفیا آرڈیننس  غیر آئینی تے غیر قانونی اے،حکومت بھارتی جاسوس نُوں سہولت کیوں دے رہی اے؟:بلاول بھٹو زرداری  ……٭رویل نیوز٭

سکھر (نمایندا رویل) پاکستان پیپلز پارٹی دے چیئرمین بلاول بھٹو زرداری نے کہیا اے کہ پی ٹی آئی حکومت نے بھارتی جاسوس کلبھوشن یادیو نُوں سہولت فراہم کرن لئی خفیا آرڈیننس پیش کیتاجو غیر آئینی تے غیر قانونی اے‘ حکومت بھارتی جاسوس نُوں سہولت کیوں دے رہی اے؟‘ وزیراعظم نُوں خفیا آرڈیننس اُتے استعفا دینا چاہیدا اے۔ سکھر وچ پریس کانفرنس کردیاں ہویاں بلاول بھٹو زرداری نے کہیا کہ پی ٹی آئی دی حکومت نے خفیا آرڈیننس پیش کتا‘ جہدے بارے نہ اپوزیشن نُوں دَسیا گیا نہ پارلیمنٹ تے لوکائی نُوں اعتماد وچ لیا گیا۔ اوہناں نے کہیا کہ پی ٹی آئی نے بھارتی جاسوس کلبھوشن یادیو نُوں سہولت فراہم کرن لئی آرڈیننس پیش کیتا اے‘ ایہ آرڈیننس غیر آئینی تے غیر قانونی اے‘ حکومت بھارتی جاسوس نُوں سہولت کیوں دے رہی اے؟ آرڈیننس دا کلبھوشن نے فایدا لین توں انکار کر دِتا اے جد کہ اوہنے بھارت دا جاسوس ہون دا اعتراف کر لیا اے۔ اوہناں دا کہنا سی کہ جے آرڈیننس لیان دی لوڑ وی سی تے حکومت نُوں اپوزیشن تے لوکائی نُوں دَسنا چاہیدا سی‘ جے ایس قسم دا آرڈیننس اسیں لے آندے تے تے ساڈا جینا حرام کر دِتا جاندا‘ جے ایہو جہیا آرڈیننس اسیں لے آندے تے دفاع پاکستان کونسل اسلام آباد وچ دھرنا دے دیندی۔ بلاول بھٹو نے کہیا کہ پاکستان وچ قانون ساریاں لئی اِک ہونا چاہیدا اے‘ خورشید شاہ دے نال نا انصافی ہو رہی اے تے اوہ کلے رکن اسمبلی نیں جہناں دی ضمانت نہیں ہو رہی۔ عمران خان کہندے نیں خارجا پالیسی اوہناں دی سبھ توں وڈی کامیابی اے‘ کلبھوشن نُوں آرڈیننس دے رہے نیں‘ کیہ ایہ تہاڈی خارجا پالیسی دی کامیابی اے؟ اوہناں نے کہیا کہ عمران خان پاکستان نُوں واپس ون یونٹ فارمولے اُتے لے جانا چاہندے نیں‘ اج وی این ایف سی اُتے حملے ہو رہے نیں‘ عمران خان کہندے نیں وزرائے اعلا ڈکٹیٹرز نیں جد کہ ایس سال سندھ نُوں 229 ارب رُپئے گھٹ ملے نیں۔ اِک سوال دے جواب وچ چیئرمین پیپلز پارٹی نے کہیا کہ ایہ لوک جے آئی ٹی‘ جے آئی ٹی کھیڈ رہے نیں تے لیاری دی لوکائی دی کردار کشی کر رہے نیں‘ کراچی وچ رہن والیاں نُوں پتا اے جدوں پورا کراچی سڑ رہیا سی تے تُسیں لیاری وچ پناہ لیندے سو‘ جدوں کراچی بند ہوندا سی تے جرایم لیاری توں نہیں ہوندے سن اوہ جرایم کوئی ہور کردے سن۔ اوہناں نے کہیا کہ لیاری گینگسٹرز اسامہ بن لادن توں تے گھٹ سن‘ اسامہ بن لادن دے معاملے اُتے جے آئی اسیں اج تک نہیں ویکھی‘ احسان اللہ احسان اے پی ایس دُکھانت وچ ملوث سی تے پی ٹی آئی حکومت وچ چھڈدِتا گیا‘ عمران خان دے خلاف پریس کانفرنس کردے آں تے احسان اللہ احسان توں دھمکی دوائی جاندی اے جد کہ کراچی وچ سبھ توں خطرناک گینگسٹرز لیاری دے نہیں ناین زیرو دے سن