کیہ واقعی 20 جولائی نوں چَن اُتے پہلا قدم رکھیا گیا سی؟؟؟ــــــ ٭رویل٭

کیہ واقعی 20 جولائی نوں چَن اُتے پہلا قدم رکھیا گیا سی؟؟؟ــــــ ٭رویل٭

میرا چن پُت ۔۔۔ یاںمیرا محبوب چن اے،چن دا ٹوٹا اے،چن ورگی سوہنی مٹیار ایہ گلاں تے آل دوالے ضرور سُنیاں ای ہوون گئیاں پر ایس دے نال نال ایہ وی ضرور تُسیں نہیں تے کسے نوں کہندے تاں سُنیا ہوونا اے کہ "کیہ چن چڑھا چھڈیا ای؟" انج تے انج دیاں ہور گلاں روز ورتارے وچ آندیاں ای رہندیاں نیں جہناں اُتے کدے کسے نے گوہ ای نہیں کیتا ہونا کیوں جے ایہ ساڈے جیون دا حصا ای بن کے رہ گئیاں نیں انج کیوں ہویا چن تے تاں کوئی گیا ای نہیں صرف دھرتی توں ای کھلو کے چن نوں چمکدا ویکھیا گیا (بھاویں ایہ چانن وی اوس دا منگواں ای سی)فیر اجہیاں کہانیاں وی بن گئیاں

"چن اُتے بُڈھی مائی چرخا کت رہی اے"

"چندا ماموں"

"چن تے پریاں رہندیاں نیں "

ایہ سبھ کہانیاں بڑے چراں توں ساڈے دیس وچ پرچلت سن تے جو سوچ رہے سن اوہناں دی سدھر سی کہ ایس اُتے اک وار جا کے ویکھیا جاوے کہ اوتھے اصل وچ ہے کیہ اے؟فیر اک دیہاڑے انسان دی تواریخ دا اجہیا دن آیا جس نے ایہ سبھ لوک کہانیاں تے من گھڑت گلاں نوں وگاہ کے پرانہ ماریا تے چن دی سطح دے حوالے نال نویاں گلاں سمجھا دتیاں۔ دھرتی توں چن تیکر دو لکھ چالھی ہزار میل دا پندھ اے جس نوں 1969 توں پہلاں کسے نے نہیں سی پورا کیتا ایہ پینڈا اجہیا پینڈا سی جس نال انسان دے ذہن وچ اُکرے کئی سوالاں دے جواب دینے سن۔13 ستمبر1959 نوں سوویت یونین ولوں لیونا2 ناں دا جہاز چن تے گھلیا گیا ایہ سبھ توں پہلاں انسانی ہتھ نال بنی شے سی جو چن تیکر اپڑی سی۔ چن تیکر اپڑن لئی عام جہازاں دی ورتوں نہیں کیتی جا ندی سگوں ایہدے واسطے خاص قسم دے راکٹ وانگ خلائی جہاز تیار کیتے جاندے نیں جو خلا وچ سفر کر سکدے نیں تے اپنی منزل نوں اپڑ سکدے نیں نیل آرمسٹرانگ جس خلائی جہاز وچ گئے اوس دا ناں "اپالو11" سی۔

نِیل آرمسٹرانگ پندرھاں اگست 1930 نوں جنمے تے 25 اگست 2012 نوں وفات ہوئی ۔انڈیانا دی اک یونیورسٹی پُروڈو وچ امریکن بحری فوج دے شعبے دے خرچے تے پڑھدے رہے ایتھے اوہناں نے ایروناٹیکل انجینئرنگ دی پڑھائی کیتی ایس نوں سوکھیاں اکھراں وچ فضائی انجینئرنگ کہیا جا سکدا اے۔ اوہ اک امریکن سن جو پائلٹ وجوں تے اک یونیورسٹی وچ پروفیسر وجوں وی کم کردے رہے۔ایس توں مگروں اوہ امریکا دی ائیر فورس نال وی جُڑے رہے تے 1962 وچ ناسا وچ چلے گئے امریکا دی ائیر فورس دے پروگرام "انسان خلا وچ " شامل ہوئے" جیمنی8 "ناں دے خلائی جہازوچ پہلاخلائی سفر 1966 وچ کیتا۔

20 جولائی 1969 وچ نِیل آرمسٹرانگ تے بز ایلڈرن پہلے لوک سن جہناں نے چن تے قدم رکھیا۔ایہ پِیر دا دیہاڑ سی جس نال دُنیا دی تواریخ وچ اک یاد گار موقعا آ گیا ایہ اجہیا واقعا سی جس نے انسان دی سوچ نوں وی زمین توں چن تیکر اپڑایا ای نہیں سگوں کامیاب وی کر دتا ایس اُتے ساری انسانیت خُش سی تے پوری دُنیا وچ جشن دا سماں سی پر دوجے پاسے کجھ لوک اوہ وی نیں جو ایس نوں من گھڑت کہانی توں وکھ کجھ نہیں سمجھدے نیں۔

ناسا ولوں جو کھوج چن بارے ساہمنے آئی اے اوہدے وچوں کجھ گلاں بڑیاں دلچسپ نیں جویں کہ چن دی سطح کھردری تے سخت ہوون دے نال نال بہت بدبو والی وی اے ہُن کوئی اپنے محبوب نوں چن ورگا کہوے تے اوس بارے تُسیں اندازا آپ ای لانا اے۔سائنسداناں دی اک چِنتا ایہ وی سی کہ اوہ خوفزدا سن کہ خلا دے وایرس دھرتی اُپر آ کے انساناں تے ہور جانداراں واسطے خطرناک وی ثابت ہو سکدے نیں۔بھاویں ایس توں بعدوں وی پوری دُنیا اج وی نویاں نویاں کھوج پرکھاں ول ٹورا ٹُر رہی اے ایس نال نویں سِٹے کڈھن دے جتن کیتے جا رہے نیں تے اسیں اجے تیکر ایسے ای سوال اُتے پھسے ہوئے آں کیہ واقعی چن نوں فتح کیتا گیا سی۔۔۔۔۔۔۔۔۔۔۔۔۔۔۔۔۔۔۔۔؟