نیب اپوزیشن نُوں پھڑ دا اے پر حکومت وچ بیٹھے کرپٹ نظر نہیں آندے، وڈی عید توں بعد  مسلم لیگ (ن)  دا حکومت بارے وڈا فیصلا……٭رویل نیوز٭

اسلام آباد (نمایندا رویل) مسلم لیگ (ن) نے عید دے بعد پارلیمنٹ دے اندر تے باہر حکومت نُوں ٹف ٹایم دین دا فیصلا کر لیا‘پاکستان مسلم لیگ (ن) نے کہیا اے کہ خواجا برادران کیس وچ سپریم کورٹ دے تواریخی فیصلے دے بعد نیب ادارا ختم ہو گیا‘ احتساب تماشے دا کھو کھلا پن لوکائی دے ساہمنے آ گیا‘ ملک وچ نیب راہیں سیاسی انجینئرنگ دی کوشش کیتی جا رہی اے‘ جتھے نا انصافی ہووے گی اوہ ملک نہیں چل سکد‘ نیب ادارے دا کوئی قانونی جواز نہیں رہیا‘ پارلیمنٹ نُوں احتساب دا نواں ادارا بنانا چاہیدا اے‘ قانون سازی لئی اپوزیشن اپنیاں ذمے داریاں ادا کرے گی۔وسیلیاں مطابق مسلم لیگ (ن) دی سانجھی پارلیمانی پارٹی دا اجلاس پارلیمنٹ ہاؤس وچ ہویا‘ جہدی صدارت چیئرمین ن لیگ راجا ظفر الحق تے پارلیمانی لیڈر خواجا آف نے سانجھے طور اُت یکیتی۔ اجلاس وچ فیصلا کیتا گیا کہ عید دے بعد پارلیمنٹ دے اندر تے باہر حکومت نُوں ٹف ٹایم دِتا جاوے گا جد کہ سانجھی پارلیمانی پارٹی نے قیادت تے اپوزیشن جماعتاں دی اے پی سی دا ایجنڈا وسیع البنیاد تے با مقصد بنان اُتے زور دِتا۔ ایس توں بعد پچھلے وزیراعظم شاہد خاقان عباسی‘ پچھلے وفاقی وزیر خواجا سعد رفیق‘ خواجا آصف تے احسن اقبال نے سانجھی پریس کانفرنس کیتی جہدے وچ شاہد خاقان عباسی نے کہیا کہ خواجا برادران کیس وچ عدالت دا فیصلا تواریخی اے سپریم کورٹ نے فیصلے وچ نیب دی حقیقت لکھی اے۔ سپریم کورٹ نے نیب دے بارے وچ جو لکھیا اوہ ایس قدر حقیقت اُتے مبنی اے کہ حکومت تے نیب نُوں چاہیدا اے کہ ادارے نُوں ختم کر دےن‘ نیب اپوزیشن نُوں پھڑ دا اے پر حکومت وچ بیٹھے کرپٹ نظر نہیں آندے۔ اوہناں نے کہیا کہ نیب دے ہتھکنڈے ملکی مفاد وچ نہیں نیں‘ چیئرمین نیب کسے عدالت دے جج نہیں نیں‘ انسان وچ اینی اخلا قی جرات ہونی چاہیدی اے‘ جدوں اعلا عدلیا اِک ادارے بارے ایس طرحاں دی گل کرے تے فیر ادارے دا وجود نہیں رہندا۔ سعید رفیق لئی بڑا سوکھا سی کہ اوہ کہندے میں اسمبلی وچ نہیں بولاں گا‘ تقریر نہیں کراں گا پر سعید رفیق نے اوہناں دی گل نہیں منی۔ اوہناں نے کہیا کہ حق نُوں حق کہیا تے اج سچ دا بول بالا ہویا‘ خواجا سعد رفیق اعلا عدلیا وچ گئے‘ عدالت نے فیصلے وچ لکھا کہ نیب نُوں نہیں بھُلنا چاہیدا اے کہ قانون نے جہڑا اختیار دِتا اے اوہدی حد کراس نہ کیتی جاوے‘ ساڈے آئین وچ جہڑے انسانی حقوق نیں اوہناں نُوں سبوتاژ کرن دا کسے نُوں حق نہیں اے‘ اِک بندے اُتے الزام نہیں لگا‘ ر اوہنوں پوری دنیا دے ساہمنے بدنام کیتا جا رہیا اے؟ جہڑے ملک وچ نا انصافی ہووے گی اوہ ملک نہیں چل سکدا‘ ملک وچ احتساب دے ناں اُتے تماشا لگا ہویا اے‘ ایہ اوہی گلاں نیں جہڑیاں اسیں پچھلے 2 سال توں کر رہے ساں‘ اوہی گلاں سپریم کورٹ نے اپنے فیصلے وچ لکھ دِتیاں نیں‘ خواجا آف دا فیصلاتواریخی حیثیت رکھدا اے۔ ایس موقع اُتے خواجا سعد رفیق نے کہیا کہ عدلیا وچ فیصلے دا جہڑا منظر کل ویکھن نُوں مِلیا ایہدے لئی ساڈھے 3 سال توں انتظار کر رہے ساں‘ فیصلے دے 3 حصے نیں‘ اِک حصا ساڈے کیس بارے‘ دوجا نیب تے پاکستان بارے سی۔ اوہناں ن کہیا کہ سانوں چور ڈاکو ثابت کرن لئی پورا زور لایا گیا‘ اِک زور بندیاں دا تے اِک اللہ دا اے‘ اللہ دی لاٹھی بے اواز اے جہڑی ازاد عدلیا لئی اسیں جیلاں کٹیاں‘ اوتھوں انصاف وچ دیر ہوئی‘ نیب ادارے دا کوئی قانونی جواز نہیں‘ ایہنوں ختم کر کے ایہو جہیا ادارا بنایا جانا چاہیدا اے جہڑا آئین تے قانون دے تحت فیصلے کرے‘ پارلیمنٹ نُوں احتساب دا نواں ادارا بنانا چاہیدا اے‘ پارلیمنٹ ایس حوالے توں قانون سازی کرے‘ اسیں اپنی ذمے داری ادا کراں گے۔ ایس موقع اُتے مسلم لیگ ن دے آگو خواجا آصف نے کہیا کہ اپنی جماعت ولوں صحافی مطیع اللہ جان نُوں پولیس دی تحویل وچ لین دی مذمت کردا آں۔ خواجا آصف نے خواجا سعد رفیق تے سلمان رفیق دی درخاست ضمانت بارے سپریم کورٹ دے فیصلے دا حوالا دیندیاں ہویاں کہیا کہ عدلیا وچ جان والے تے انصاف دے طلبگار ایس کیس دا حوالا دین گے۔ اوہناں نے کہیا کہ خواجا سعد رفیق تے خواجا سلمان رفیق نُوں خراج تحسین پیش کردا آں کہ اوہناں نے موجودا نظام دے خلاف جنگ وچ بڑیاں اوکڑاں برداشت کیتیاں پر پچے نہیں ہٹے تے اج وی اِک چٹان وانگوں اپنے نظریے‘ قائد تے جماعت دے نال کھلوتے نیں‘ ایہ اِک ایہو جہے عمل دا اغاز اے جہڑا ایس گل دی شہادت دے رہیا اے کہ آن والے ویلے وچ انصاف دا بول بالا ہووے گا تے حکمران جدوں اپنی ذاتی انا تے اغراض و مقاصد لئی قانون تے اداریاں دا استعمال کردے نیں تے کسے نہ کسے دن انصاف دا بول بالا ہوندا اے۔ خواجا آصف نے کہیا کہ میڈیا جہڑا کردار ادا کر رہیا اے تے حکومت دے خلاف میڈیا وچ جہڑیاں اوازاں اُٹھ رہیاں نیں تے 2 سال وچ کایا پلٹی اے کہ ایہو ایہو جہیاں اوازاں جہڑیاں حکومت دی حمایت کردیاں سن‘ اج اوہ ایہناں دے سبھ توں وڈے ناقد بن گئے نیں‘ مطیع اللہ جان نے میڈیا تے صحافت دی ازادی لئی پہلے وی گل کیتی تے اج وی گل کیتی تے میرا خیال اے کہ اج بدھ نُوں سپریم کورٹ وچ توہین عدالت دے مقدمے وچ اوہناں دی پیشی وی سی‘ ایہو جہے موقع اُتے اوہناں نُوں تحویل وچ لینا‘ اوہناں دی اواز نُوں‘ صحافت دی اواز نُوں چُپ کروان دی اِک کوشش اے جہڑی ناکام ہووے گی‘ اسیں بحیثیت پارٹی اسمبلی دے اندر تے باہر ازادی اظہار رائے دی حمایت کراں گے کہ اسی ملک وچ ہر بندے نُوں جہڑا وی ضابطا اخلاق اے اوہدے مطابق تقریر و تحریری دی ازادی ہونی چاہیدی اے۔