اسلام آباد وچ مندر اُساری کیس بارے سنوائی ……٭رویل نیوز٭

اسلام آباد (نمایندا رویل) چیف جسٹس اسلام آباد ہائیکورٹ جسٹس اطہر من اللہ نے وفاقی راجدھانی وچ مندر دی اُساری بارے درخاست اُتے سنوائی دوران ریمارکس دِتے نیں کہ عدالت انڈیا وانگوں پاکستان نُوں چلان دی اجازت نہیں دے سکدی۔ چیف جسٹس اسلام آباد ہائیکورٹ جسٹس اطہر من اللہ دی اگوائی وچ 2 رکنی بینچ نے مندر اُساری بارے کیس دی سنوائی کیتی۔ سنوائی دوران درخاست گزاروکیل نے کہیا کہ اسلامی جمہوریا پاکستان وچ آئین دی بنیاد اسلام اے‘ مسلم ریاست وچ مندر بنان دی اجازت نہیں دِتی جا سکدی۔ جسٹس اطہر من اللہ نے ریمارکس دِتے کہ کیہ اقلیتاں پاکستان نُوں چھڈ دین؟ عدالت انڈیا وانگوں پاکستان نُوں چلان دی اجازت نہیں دے سکدی‘ جو تُسیں کَہ رہے او ایہ دوجے ملکاں وچ رہن والے مسلماناں لئی وی ٹھیک نہیں‘ کیہ تُسیں چاہندے او دوجے ملکاں وچ مسلماناں دے نال ایہو جہیا سلوک ہووے؟۔عدالت نے فیصلا محفوظ کر لیا۔