پی سی بی دے ”اعزازی“ چیئرمین لئی سہولتاں دی لاین،سہولتاں وچ میڈیکل‘ بزنس کلاس وچ سفر‘ فائیو سٹار……٭رویل نیوز٭

لاہور (نمایندا رویل) پی سی بی دے ”اعزازی “ چیئرمین نُوں بے شمار سہولتاں حاصل نیں۔ چیئرمین پی سی بی دا عہدا پان لئی وڈیاں وڈیاں شخصیات خوب کوششاں کردیاں نیں‘ بظاہر تے ایہ پوسٹ اعزازی پر بھرویاں سہولتاں ایہنوں بہترین بنا دیندیاں نیں۔ دستاویزات دے مطابق ہیڈ آفس لاہور دا رہایشی نہ ہون دی صورت وچ چیئرمین نُوں مکمل فرنیشڈ رہایش یاں 1 لکھ رُپئے مہینا وار دِتے جاندے نیں۔ پی سی بی دی ویب سایٹ اُتے موجود تفصیلات دے مطابق احسان مانی دی رہایش اُتے جولائی 2019 توں جون 2020 تک 40 لکھ 24 ہزار 260 رُپئے خرچ ہوئے نیں‘ یعنی ہر مہینے تقریبن 3 لکھ 35 ہزار رُپئے رہایش اُتے لگدے نیں۔ پچھلے 6 توں ورھیاں وچ کسے ہور ”اعزازی“ چیئرمین نے لاہور وچ رہایش اُتے بورڈ توں اینی رقم خرچ نہیں کروائی۔ اعزازی چیئرمین لئی بورڈ دیاں سہولتاں وچ میڈیکل دی سہولت‘ بزنس کلاس وچ سفر تے فائیو سٹار ہوٹل وچ قیام سنے ہور وی شامل نیں جہناں دے خرچے وکھرے نیں۔