سردار عثمان بزدار ولوں وڈی عید تے پنجاب اندر سمارٹ لاک ڈاؤن دی منظوری……٭رویل نیوز٭

لاہور (نیوز ڈیسک) وزیر اعلا پنجاب نے عید دے موقع اُتے صوبے وچ سمارٹ لاک ڈاؤن دی منظوری دے دِتی‘ مارکیٹاں تے شاپنگ مالز عید توں 2`3 دن پہلاں بند کرن دا فیصلا کر لیا گیا۔ چیف سیکرٹری پنجاب کہندے نیں کہ کرونا توں بچاء لئی عید توں پہلاں سمارٹ لاک ڈاؤن مجبوری اے‘ سول سیکرٹریٹ دے وسیلیاں مطابق سمارٹ لاک ڈاؤن دا نوٹیفکیشن تیار کر لیا گیا اے‘ کسے ویلے وی جاری ہو سکدا اے۔ سمارٹ لاک ڈاؤن دے دوران جنور منڈیاں‘ یوٹیلیٹی سٹورز‘ دُدھ‘ دہی‘ تندور تے میڈیکل سٹور کھلے رہن گے۔ جنور منڈیاں وچ ایس او پیز تے سیکیورٹی دے انتظامات ہور سخت کرن دا فیصلا کیتا گیا اے۔ ایس توں وکھ وڈی عید دی نماز لئی پنجاب سرکار ولوں ایس او پیز جاری کر دِتے گئے نیں جہناں اُتے عملدرآمد دی ذمے داری ضلعی حکام دے نال نال مسیتاں دیاں کمیٹیاں اُتے عاید ہووے گی۔ خلاف ورزی ساہمنے آن اُتے قاعدیاں دے مطابق کارروائی کیتی جاوے گی۔ ایس توں وکھ وزیر اعلا پنجاب سردار عثمان بزدار نے کہیا اے کہ آٹے کھنڈ سنے لوڑی دیاں شیواں دیاں قیمتاں وچ استحکام لئی ہر انتظامی اقدام چُکیا جاوے۔ بھاء وچ اپنے کولوں وادھا کرن والیاں دے خلاف قانونی کارروائی کیتی جاوے‘ ناجایز منافع خوراں تے ذخیرا اندوزاں دے خلاف بلا امتیاز کارروائی جاری رکھی جاوے تے کاغذی کارروائی دی بجائے عملی کارروائی کر کے رپورٹ وزیر اعلا آفس گھلی جاوے۔ اوہناں نے کہیا کہ انتظامی افسران تے پرائس کنٹرول مجسٹریٹس فیڈ وچ جا کے قیمتاں دی مانیٹرنگ کرن تے لوڑی دیاں شیواں دی ریٹ لسٹ دے مطابق ویچ وٹک یقینی بنائی جاوے‘ لوکائی نُوں مصنوعی مہنگائی پیدا کرن والیاں دے رحم و کرم اُتے نہیں چھڈاں گے۔