وڈے چیلنجز عید الاضحیٰ تے محرم الحرام  نوں ساہمنے آنے نیں،مرن والیاں دی تعداد اَسی(80) فیصد گھٹ ہو گئی:  ڈاکٹر ظفر مرزا……٭رویل نیوز٭

اسلام آباد (نمایندا رویل)) وزیراعظم دے معاون خصوصی برائے صحت ڈاکٹر ظفر مرزا نے کہیا اے کہ ملک وچ کرونا نال مَوتاں وچ 80 فیصد کمی آ گئی جد کہ مثبت کیسز 32 فیصد گھٹ ہو کے 6 فیصد اُتے آ گئے نیں۔ ایتوار نُوں اسلام آباد وچ نیوز کانفرنس کردیاں ہویاں ظفر مرزا نے کہیا کہ ملک وچ وباء دے کھلار وچ بہت کمی آئی اے جہدے اُتے اللہ دا بہت شکر ادا کرنا چاہیدا اے‘ کئی لوک بیماری وچ کمی بارے شکوک و شبہات دا شکار نیں‘ پر ایس کمی دا بین الاقوامی طور اُتے اعتراف کیتا گیا اے تے کسے نُوں شک و شبے دا شکار نہیں ہونا چاہیدا اے۔ ڈاکٹر ظفر مرزا نے دَسیا کہ جے پہلے کرونا دے 100 وِچوں 23 ٹیسٹ مثبت آندے سن تے ہُن اوہ 6 یاں 7 اُتے آ گئے نیں جد کہ مَوتاں وچ 80 فیصد کمی ہو گئی اے‘ پاکستان وچ کرونا دی بیماری بارے سارے ملکی تے عالمی اندازے دھرے دے دھرے رہ گئے تے اسیں اِک مہینے پہلاں ای جون دے ادھ وچ وباء دا عروج ویکھ لیا۔ ظفر مرزا دا کہنا سی کہ ملک نُوں ہُن 2 وڈے چیلنجز عید الاضحیٰ تے محرم الحرام درپیش نیں‘ ہور ملکاں دے تجربے توں پتا لگدا اے کہ کرونا وباء وچ کمی دے بعد دُبارا وادھا وی ہو سکدا اے‘ ایس لئی آن والے دناں وچ پاکستان وچ وی وباء وچ دُبارا وادھے دا پکا امکان اے‘ ایس لئی عید اُتے میل ملاپ نال بیماری دے کھلار وچ وادھا ہوندا اے‘ لوک انتہائی ذمے داری دا مظاہرا کرن۔ معاون خصوصی نے ہور کہیا کہ وڈی عید دے تجربے دی روشنی وچ بہت زیادا سوچ وچار تے علماء نال مشاورت دے بعد وڈی عید لئی ایس او پیز بنائے نیں تے قومی حکمت عملی بنائی گئی اے‘ صدر مملکت عارف علوی آپ ایس معاملے نُوں ویکھ رہے نیں‘ ہُن 4 شیواں اُتے خصوصی توجا دی ضرورت اے‘ جنوراں دی ویچ وٹک لئی شہر وچ منڈی لان دی اجازت نہیں‘ شہری انفرادی دی بجائے اجتماعی قربانی نُوں ترجیح دین‘ قربانی تے گوشت ونڈن ویلے لوکاں دا ہجوم نہ بنان‘ لوکائی توں درخاست اے کہ ایہنوں عام عید نہ سمجھن سگوں مختلف سمجھن‘ احتیاطی تدبیراں اختیار کرن۔ایس توں وکھ نیشنل کمانڈ اینڈ اپریشن سینٹر دے مطابق پچھلے 24 گھنٹیاں وچ ملک وچ ہور 1226 کرونا کیسز رپورٹ ہوئے جد کہ ہور 35 روگی چلانا کر گئے۔ پاکستان وچ کرونا وایرس نال متاثرا کیساں دی مجموعی گنتی 2 لکھ 73 ہزار 113 ہو گئی اے۔