جویریہ سعود نے سلمیٰ ظفر دے تنخاہواں نہ دیون دے الزامات رَد کر دِتے……٭رویل نیوز٭

لاہور (نمایندا رویل) اداکارا تے پروڈیوسر جویریہ سعود قاسمی نے سینئر اداکارا سلمیٰ ظفر ولوں لائے گئے سارے سنگین الزاماں دی تردید کردیاں ہویاں کہیا اے کہ جے اسیں اوہناں دا معاوضا نہیں دے رہے ساں تے اوہناں نے ساڈے نال 7 سال کس طرحاں کم کیتا۔ اِک انٹرویو وچ جویریہ سعود دا کہنا سی کہ سلمیٰ ظفر ہر پراجیکٹ وچ آخر تک ساڈے نال ای رہے۔ دوجی گل ایہ اے کہ اسیں اوہناں دے پیسے کئی سال پہلے ای کلیئر کر دِتے سن پتا نہیں ایہ کہڑا حساب لا کے بیٹھے ہوئے نیں‘ اچانک اوہناں نُوں کیہ یاد یا اے۔ جے اسیں اوہناں دے پیسے نہ دِتے ہوندے تے ایہنے سکون نال زندگی نہ لنگھا رہے ہوندے۔ سلمیٰ ظفر نے کجھ مہینے پہلاں مینوں کہیا سی کہ اِک بزنس شروع کر رہی آں بڑی چنگی پارٹی دے نال تُسیں وی آ جاؤ ایس بزنس وچ‘ تے میں اوہناں نُوں کہیا کہ مینوں دلچسپی نہیں اے۔ اوہناں دے بہت اصرار اُتے جدوں میں منع کیتا تے اوہناں نُوں بہت بُرا لگا تے اوہدے بعد ایہ ویڈیو ساہمنے آ گئی جہدے وچ ایہ ساڈے اُتے دنیا جہاں دے الزامات لا رہے نیں۔