پاکستان وچ دہشتگردی افغانستان توں ہوندی اے:اقوام متحدا دی رپورٹ   ……٭رویل نیوز٭

نیو یارک (اُچیچا نمایندا) اقوام متحدا دی رپورٹ وچ انکشاف کیتا گیا اے کہ پاکستان وچ دہشتگردی افغانستان توں ہوندی اے‘ کالعدم ٹی ٹی دی پی دی قیادت سرحد پار توں کارروائیاں دی ذمے دار اے۔ رپورٹ وچ کہیا گیا اے کہ کالعدم جماعت الاحرار وی پاکستان وچ ہون والیاں دہشتگرد کارروائیاں وچ ملوث اے۔ ایہ کالعدم تنظیماں پاکستان وچ دہشتگردانا حملیاں دیاں ذمے داریاں قبول کر چکیاں نیں جد کہ افغانستان وچ داعش دی موجودگی خطے لئی خطرا اے۔ یو این رپورٹ وچ ہرکھ دا وکھالا کردیاں ہویاں کہیا گیا اے کہ انڈیا وچ مووجد دہشتگرد عناصر گوانڈھی ملکاں لئی خطرا بن چُکے نیں‘ عالمی برادری ایہو جہے عناصر دے خلاف ایکشن لین لئی ہندستان اُتے دباء ودھا رہی اے۔ دوجے پاسے اقوام متحدا وچ پاکستان دے مستقل مندوب منیر اکرم نے کہیا اے کہ افغانستان توں پاکستان وچ ہون والی دہشتگردی وچ بھارت ملوث اے۔ نیو یارک وچ میڈیا نال گلباتکردیاں ہویاں اوہناں دا کہنا سی کہ اقوام متحدا دی رپورٹ نے وی واضح کر دِتا کہ افغانستان توں ہون والی دہشتگردی وچ بھارت ای ملوث اے۔ اوہناں دا کہنا سی کہ بھارت وچ دہشتگرد موجود نیں جہڑے سری لنکا سنے خطے دے ہور ملکاں وچ دہشتگردانا کارروائیاں کر رہے نیں۔ افغانستان دی سرزمین پاکستان وچ دہشتگردانا کارروائیاں لئی استعمال ہو رہی اے جہدا جواب دینا ضرری اے۔ منیر اکرم نے کہیا کہ بھارت دے دہشتگردی وچ ملوث ہون دا معاملا اقوام متحدا وچ چُکیا اے۔ بھارت دی دہشتگردی نُوں ہر پلیٹ فارم اُتے بے نقاب کراں گے۔