کرونا نال انتہائی گھٹ ہلاکتاں ہوئیاں‘ ہسپتالاں وچ بھار گھٹ ہو چکیا‘  عید تے محرم الحرام وچ سخت احتیاط دی  لوڑ:وزیراعظم دی میڈیا بریفنگ ……٭رویل نیوز٭

اسلام آباد (نمایندا رویل) وزیراعظم عمران خان نے کہیا اے کہ اج پاکستان اوہناں کجھ ملکاں وِچوں اے جہناں نے کرونا وایرس اُتے قابو پا لیا اے‘ وزیراعظم نے شہریاں نُوں آن لاین قربانی دی تجویز دیندیاں ہویاں کہیا کہ وڈی عید تے محرم الحرام وچ احتیاط نہ کیتی تے وباء دُبارا کھلر سکدی اے۔ پیر نُوں میڈیا بریفنگ دے دوران وزیراعظم عمران خان نے پاکستان وچ کرونا وایرس دی صورتحال سنبھلن اُتے اپنی ٹیم دا شکریا ادا کردیاں ہویاں کہیا کہ دنیا وچ ساڈی پہلی حکومت سی جہنوں سمجھ آ گیا سی کہ جدوں تہاڈے ملک وچ غربت ہووے تے سانوں کس طرحاں ایس کرونا وباء نال لڑنا پوے گا‘ اوہناں نے کہیا کہ اللہ تعالیٰ دا خاص کرم اے کہ پاکستان وچ کرونا کیسز دی گنتی گھٹ ہوئی اے۔ پاکستان دنیا دے اوہناں کجھ ملکاں وِچوں اے جتھے وباء اُتے قابو پا لیا گیا اے‘ پچھلے 3 دن دے دوران پاکستان وچ کرونا نال انتہائی گھٹ ہلاکتاں ہوئیاں‘ ہسپتالاں وچ بھار کافی حد تک گھٹ ہو چکیا اے‘ پر سانوں اگے وی سخت احتیاط دی ضرورت اے۔ اوہناں نے کہیا کہ شروع وچ ساڈے اُتے دباء پایا گیا کہ یورپ وانگوں لاک ڈاؤن کرو‘ پر ساڈا سمارٹ لاک ڈاؤن دا فیصلا بہترین رہیا کیوں جے ساڈے معاشی حالات یورپ توں بلکل مختلف اے‘ پاکستان وچ سبھ توں ودھ لاک ڈاؤن دا اثر ہیٹھلے طبقے اُتے پیا‘ اسیں سوچیا کہ کرونا توں بچا ندیاں بچاندیاں انج نہ ہووے کہ ساڈے لوک بھُکھ نال مر جان‘ ایس لئی غریب لوکاں نُوں بچان لئی شفافیت نال احساس پروگرام شروع کیتا گیا‘ مشکل حالات توں بچن لئی احساس پروگرام نے غریباں دی بہت مدد کیتی۔ وزیراعظم نے کہیا کہ وایرس توں دنیا ہُن تک سکھ رہی اے‘ احتیاط نہ کرن اُتے کرونا فیر خطرناک ہو سکدا اے‘ اسیں احتیاط نہ کیتی تے سانوں ہور نقصان پہنچ سکدا اے‘ ایس لئی لوکائی توں اپیل کردا آں کہ وڈی عید احتیاطی تدبیراں نال مناؤ۔ وڈی عید تے محرم الحرام اُتے لوکائی دی بے احتیاطی نال دُبارا سخت لاک ڈاؤن لانا پوے گا جہدے نال ہور معاشی نقصان ہووے گا تے کرونا کیسز وچ وی وادھا ہووے گا۔ اوہناں نے ہور کہیا کہ بھارت نے سخت لاک ڈاؤن کیتا پر اوتھے کیسز وی ودھ رہے نیں‘ اوتھوں دا ہیٹھلا طبقا بلکل پِس گیا۔ کرونا کیسز نُوں سمجھن دی ضرورت اے کیوں جے ایہدے وچ عجیب طرحاں دے کیس ساہمنے آئے‘ بھارت وچ کیسز دا گراف تیزی نال ودھ رہیا اے جد کہ پاکستان وچ تیزی نال تھلے آ رہیا اے۔ دوجے پاسے سپین وچ لاک ڈاؤن دے باوجود روزانا ہزاراں ہلاکتاں ہوئیاں۔ اوہناں نے لوکائی نُوں ہدایت کیتی کہ اوہ جنوراں دی خریداری دے دوران منڈیاں وچ جان تے ایس او پیز اُتے سختی نال عمل کرن تے ماسک دا استعمال لازمی کرن‘ جے اسیں وڈی عید تے محرم وچ کرونا نُوں کنٹرول کرن وچ کامیاب ہو گئے تے اسیں سیاحت تے شادی ہالز تے ریستوران نُوں کھول دواں گے کیوں جے سیاحت‘ شادی ہالز تے ریستوران بند ہون نال کئی لوک بیروزگار نیں جد کہ سکول تے یونیورسٹیاں وی بند پئیاں ہوئیاں اے۔