سکول مالکان نُوں سخت مسئلیاں دا ساہمنا اے پر حکومت نُوں کوئی پرواہ نہیں:چیف جسٹس اسلام آباد……٭رویل نیوز٭

اسلام آباد (نمایندا رویل) چیف جسٹس اسلام آباد ہائیکورٹ جسٹس اطہر من اللہ نے اِک کیس دی سنوائی دے دوران ریمارکس دِتے نیں کہ سکول کھولن بارے پالیسی بنانا حکومت دا کم اے تے ایہدے وچ عدالت مداخلت نہیں کرے گی۔ چیف جسٹس اسلام آباد ہائیکورٹ جسٹس اطہر من اللہ نے پرائیویٹ سکول مالکان ولوں سکول کھولن دی درخاست اُتے سنوائی کیتی۔ درخاست گزار دے وکیل نے عدالت نُوں دَسیا کہ کرونا دی وجھا توں سارے تعلیمی ادارے کجھ مہینیاں توں بند نیں‘ سکولز مالکان نُوں سخت مسئلیاں دا ساہمنا اے پر حکومت نُوں کوئی پرواہ نہیں‘ اسیں پیرا اتھارٹی نُوں درخاست دِتی پر ایہدے اُتے حالے کوئی فیصلا نہیں ہویا۔ جسٹس اطہر من اللہ نے ریمارکس دِتے کہ پالیسی بنانا حکومت دا کم اے‘ عدالت مداخلت نہیں کرے گی‘ منتخب حکومت لوکائی نُوں جوابدہ اے حالات ویکھ کے اوہی فیصلا کرن گے‘ صرف سکول مالکان نہیں بچیاں دی تعلیم دا وی حرج ہو رہیا اے‘ ایہ کہنا ایہ معاملا حکومت دی نظر وچ نہیں درست نہیں‘ حکومت ضرور ایس معاملے اُتے سارے مسئلیاں نُوں ویکھ تے غور کر رہی ہووے گی۔۔ چیف جسٹس نے ہدایت دِتی کہ انفرادی طور اُتے نہیں سگوں ایسوسی ایشن راہیں متعلقا اتھارٹی نال رجوع کرو‘ عدالت نے درخاست گزار نُوں متعلقا فورم نال رجوع دی ہدایت کردیاں ہویاں درخاست نبیڑ دِتی۔