پنجابی زبان دے منے پرمنے شاعر   راشد حسن رانا  ہوریں وفات پا گئے----٭رویل نیوز٭

پنجابی زبان دے منے پرمنے شاعر راشد حسن رانا وفات پا گئے----٭رویل نیوز٭

لاہور(نمایندا رویل) پنجابی زبان دے منے پرمنے شاعر تے قائد اعظم یونیورسٹی دے اُستاد راشد حسن رانا ہوریں وفات پا گئے نیں۔اوہناں دا جنازا عصر دی نماز توں بعد ادا کیتا جائے گا۔آپ نے پنجابی وچ نویں نظم وچ اپنا ناں بنایا تے موضوع دے نویکلے پن دی وجھا توں آپ دیاں نظماں نوں بہت پسند کیتا جاندا رہیا۔ "نیلے چن دی رات" "چپ چپیتی شام،"سُفنے ہوئے ریت"،"اداس رنگاں دی بارش" تے ہور پنجابی نظماں دے پراگے آپ نے پنجابی ادب نوں دِتے۔" چپ چپیتی شام " نوں پاکستان رائٹرز گلڈ ولوں انعام وی ملیا۔نیلے چن دی رات نوں قومی ادبی ایوارڈ ملیا" اداس رنگاں دی بارش" اُتے مسعودکھدر پوش ایوارڈ وی ملیا تے "نشان ادب ایوارڈ" توں وکھ ڈھیر ایوارڈ وی آپ نوں دتے گئے۔

آپ دا جنم 1944 وچ امرتسر اندر ہویا تے پاکستان بنن مگروں آپ دے وڈکے لاہور آن وسے۔ایتھے اوہناں نے لاہور دے علاقے گوالمنڈی وچ رہایش اختیار کیتی۔آپ دے والد حسن بخت وی شاعر سن جہناں نوں ویکھ کے آپ ادب دے میدان وچ آئے۔آپ نے اسلامیہ کالج ریلوے روڈ لاہور تے اوری اینٹل کالج توں اپنی تعلیم ھاصل کیتی تے فیر گورنمنٹ کالج آف کامرس وچ اُردو زبان و ادب دے لیکچرار ہو گئے بعدوں پاکستان سٹڈیز دے شعبے وچ قائد اعظم یونیورسٹی اسلام آباد وچ چلے گئے۔

یونیورسٹی توں ریٹائر منٹ توں بعد اوہ گوالمنڈی لاہور دے گھر وچ اپنا جیون لنگھا رہے سن تے اک لمے چِر توں لاہور دیاں ادبی بیٹھکاں وچ اوہ گھٹ ای آندے سن ایس کر کےمشاعریاں دا حصا نہیں رہندے سن۔ 28 جولائی 2020نوں ایہ شاعر اپنے خالق حقیقی نوں جا ملیا۔ آپ دی گھاٹ پنجابی زبان وادب وچ ہمیشا محسوس کیتی جاندی رہوے گی۔رب اوہناں نوں جنت وچ تھاں دیوے ۔آمین۔