ننگا ـــــ نِکی کہانی ــــ٭رویل٭

چوکھا سمجھاون مگروں وی مُرید ضد کر رہیا سی کہ میں بزار وچ ننگا ہونا چاہنداں ۔

مُرشد نے آکھیا فقیری تے سیانپ ننگے پن توں کئی کوہ دُور اے ، پر مرید دا ہتھ اپنے گِروان تیکر اپڑ چکیا سی جہنوں لِیرو لِیر کرن لئی اُوہ مُرشد دی اجازت نوں اُڈیک رہیا سی ۔ مُرشد چنگی طرحاں جاندا سی پئی ایہ ضدی نالے عقل توں چوکھا دُور اے ۔ کوئی دلیل منے گا تے نہ ای کوئی نصیحت ایہدے اُتے اثر کرے گی۔ اوہنے بڑے ای ٹَھڈے تے دُکھی سبھا نال ہار مندے ہوئے آکھیا:

"میں تینوں اِک گُر دس سکداں جہدے نال لیڑے پاڑن بنا ای تیری خاہش پوری ہو جاوے گی۔"

مرید نے خشی تے کالھی نال آکھیا " کرماں آلیو چھیتی دسو۔ "

مُرشد نے اوہدے موڈھے تے ہتھ دھر کے آکھیا:

" فیس بُک تے اپنا اکاؤنٹ کھول لے ۔ لیڑے لاہے بِناں ای لوکائی دے ساہمنے ننگا ہو جاویں گا۔"