ملکی مفاد وچ ہون والی قانون سازی دے بدلے این آر او نہیں دے سکدے،تعمیرات دے شعبے وچ حکومت ہر ممکن تعاون کرے گی:عمران خان ……٭رویل نیوز٭

اسلام آباد (نمایندا رویل) وزیراعظم عمران خان نے کہیا اے کہ ماضی دیاں خرابیاں نُوں درست کر رہے آں‘ اپوزیشن اپنی سیاست بچان لئی پارلیمنٹ دا فورم استعمال کر رہی اے‘ شروع توں ایہناں نے ہر قانون سازی وچ رکاوٹ پان دی کوشش کیتی‘ قومی مفاد وچ ہون والی قانون سازی وچ اپوزیشن نُوں حمایت کرنی چاہیدی اے‘ ملکی مفاد وچ ہون والی قانون سازی دے بدلے این آر او نہیں دے سکدے‘ نظریے توں ہٹ گیا تے پارٹی مُک جاوے گی‘تعمیرات دے شعبے نُوں ساریاں ممکنا سہولتاں دی فراہمی نُوں یقینی بنا رہے آں‘ تعمیراتی شعبے نال وابستا کاروباری برادری ایہناں سہولتاں دا بھرواں فایدا چُکے‘ کاروباری برادری تعمیرات دے شعبے وچ سرمایا کاری کرے‘ حکومت ہر ممکنا تعاون لئی پرعزم اے۔ ایہناں خیالاں دا اظہار اوہناں نے جمعرات نُوں پارلیمانی پارٹی اجلاس تے اپنی صدارت ہیٹھ ہون والے نیشنل کوآرڈینیشن کمیٹی برائے ہاؤسنگ‘ کنسٹرکشن اینڈ ڈویلپمنٹ دے ہفتا وار اجلاس نال خطاب کردیاں ہویاں کیتا۔ وزیراعظم نے اجلاس دے موقع اُتے حکومتی ارکان نُوں پارلیمنٹ وچ ہون والی قانون سازی بارے اعتماد وچ لیا۔ اوہناں نے کہیا کہ ایف اے ٹی ایف بارے قانون سازی پاکستان لئی ضروری اے‘ ماضی یاں خرابیاں نُوں درست کر رہے آں‘ اپوزیشن نے ملکی مفاد نُوں ذاتی مفاد اُتے نہ ترجیح دِتی تے اوہ بے نقاب ہون گے‘ ملکی مفاد وچ ہون والی قانون سازی دے بدلے این آر او نہیں دے سکدے‘ عمران خان نے رلتیاں نُوں مخاطب کردیاں ہویاں کہیا کہ تُسیں لوکائی دے نمایندے او‘ پارلیمنٹ وچ ہون والی قانون سازی وچ فعال کردار اد اکرو‘ وزیراعظم دا کہنا سی کہ اپوزیشن دی کسے بلیک میلنگ وچ نہیں آواں گے‘ اوہ این آر او منگدے نیں جہڑا اسیں کسے صورت نہیں دواں گے‘ اسیں پارٹی منشور توں پچھے ہٹ گئے تے تباہی ہووے گی۔ اوہناں نے مطالبات لکھ کے گھلے کہ منی لانڈرنگ کڈھ دوو۔ اوہناں نے کہیا کہ شہباز شریف تے بلاول زرداری 2 سال توں ساڈی حکومت ختم کرن دے پچھے لگے ہوئے نیں‘ ایہ صرف اپنا مال بچانا چاہندے نیں‘ ایہ چاہندے نیں ساڈے کیس ختم ہو جان۔ اسیں ایہناں دا کوئی کیس نہیں بنایا ایہناں دے سارے کیسز ماضی دیاں حکومتاں نے بنائے۔ خواجا آصف اُتے تنقید کردیاں ہویاں وزیراعظم نے کہیا کہ خواجا آصف نازیبا گلبات کردے نیں‘ سپیکر پروڈکشن آرڈر جاری کرن وچ احتیاط کرن اسیں ایہناں نُوں پروڈکشن آرڈر جاری کردے آں ایہ ساڈے خلاف تقریراں شروع کر دیندے نیں‘ پارٹی اراکین اسمبلی فعل کردار ادا کرن تے اپوزیشن نُوں ٹف ٹایم دِتا جاوے۔ایس توں وکھ وزیراعظم نے نیشنل کوآرڈینیشن کمیٹی برائے ہاؤسنگ‘ کنسٹرکشن اینڈ ڈویلپمنٹ دے ہفتا وار اجلاس نال خطاب کردیاں ہویاں کہیا کہ ملکی معیشت اُتے کرونا دے منفی اثرات زایل کرن‘ معاشی عمل نُوں تیز کرن تے خصوصن نوجواناں نُوں نوکریاں تے غریب لوکائی نُوں اپنی چھت دے خاب نُوں پایا تکمیل تک پہنچان لئی تعمیراتی شعبے دا فروغ کلیدی کردار دا حامل اے‘ ایس لئی ایہ شعبا حکومت دیاں پہلیاں ترجیحاں وچ شامل اے۔ وزیراعظم نے کہیا کہ تعمیرات دے شعبے نُوں ساریاں ممکنا سہولتاں دی فراہمی نُوں یقینی بنا رہے آں‘ تعمیراتی شعبے نال وابستا کاروباری برادری ایہناں سہولتاں دا بھرواں فایدا چُکے‘ کاروباری برادری تعمیرات دے شعبے وچ سرمایا کاری کرے‘ حکومت ہر ممکنا تعاون لئی پرعزم اے۔وزیراعظم نے سارے چیف سیکرٹری صاحبان نُوں ہدایت کیتی کہ حکومتی ترجیحاں دی راہ وچ رکاوٹاں پیدا کرن والے سرکاری اہلکاراں تے بجلی گیس ورگیاں سہولتاں دی فراہمی وچ اوکڑاں دا کارن بنن والے اہلکاراں دے خلاف سخت ایکشن یقینی بنایا جاوے۔