kraamaat@gmail.com
+ +92 333-430-6384


وباء وچ ودھ توں ودھ صدقا تے خیرات کرو،اوکڑاں دا  آؤنا اللہ تعالیٰ ولوں امتحان اے،‘ اسلام کسے وی قسم دے فتنے نُوں کھلارن توں روکدا اے:شیخ عبداللہ بن سلیمان دا حج دے خطبے وچ بیان ……٭رویل نیوز٭


نمائندا رویل July 31, 2020


میدان عرفات (اُچیچا نمایندا) شیخ عبداللہ بن سلیمان نے مسجد نمرہ وچ خطبا حج دیندیاں ہویاں کہیا کہ دنیا اُتے مشکلاں اللہ دا امتحان اے‘ اللہ دے حکم نال ای اوکڑاں آندیاں نیں پر اللہ نے کوئی ایہو جہی بیماری نہیں دِتی جہدا علاج نہ ہووے‘ کرونا جے ازمایش اے تے اللہ تعالیٰ دی رحمت دے بوہے وی کھلے نیں‘ ساڈے گناہاں دی وجھا توں اللہ کریم نے سانوں ازمایش وچ مبتلا کیتا اے‘ قرآن مجید وچ اے کہ معمولی مصیبت وڈے عذاب توں اگاہی اے‘ وباء وچ ودھ توں ودھ صدقا تے خیرات دوو‘ سعودی عرب وچ حج دے رکن اعظم وقوف عرفا دی ادائیگی دے بعد روح پرور خطبا حج دیندیاں ہویاں شیخ عبداللہ بن سلیمان نے کہیا کہ اسیں گواہی دیندے آں کہ اللہ دے سوا کوئی عبادت دے لایق نہیں تے اوہ کلّا اے‘اوہناں نے تقویٰ اختیار کرن اُتے زور دِتا تے کہیا کہ اللہ دے سوا کسے دی عبادت نہیں کرنی چاہیدی اے تے صرف اوہدے توں مدد منگنی چاہیدی اے‘ اللہ تعالیٰ نے ارشاد فرمایا کہ میری عبادت کرو تے میرے نال کسے نُوں شریک نہ بناؤ۔ شیخ عبداللہ بن سلیمان نے خطبا حج دیندیاں ہویاں کہیا کہ اللہ تعالیٰ نے حضرت محمدﷺنُوں آخری نبی بنا کے گھلیا اے‘ اللہ اپنے بندیاں دا امتحان لیندا اے تے جے اوہ ازمایش وچ پورے ہو جان تے اللہ ولوں اوہناں نُوں نوازیا جاندا اے‘ کرونا جے ازمایش اے تے اللہ تعالیٰ دی رحمت دے بوہے وی کھلے نیں‘ ساڈے گناہاں دی وجھا توں اللہ کریم نے سانوں ازمایش وچ پایا اے۔ قرآن مجید وچ اے کہ معمولی مصیبت وڈے عذاب توں اگاہی اے‘ وباء وچ ودھ توں ودھ صدقا تے خیرات دوو۔ اوہناں نے کہیا کہ قرآن وچ اللہ نے ارشاد فرمایا کہ تُسیں میریاں نعمتاں نُوں گننا چاہوو تے گِن نہیں سکدے‘ ایس لئی ایہناں نعمتاں اُتے اللہ دا شکر ادا کرو‘ کائنات وچ ایہو جہی کوئی شے نہیں جہڑی اللہ نہ جاندا ہووے‘ ہر اوہ گل جہڑی تہاڈے نفس تے دل وچ لُکی ہوئی اے اوہ وی اللہ جاندا اے‘ مصائب‘ اوکڑاں دا آنا اللہ دے قرب دا وسیلا اے‘ ایس ویلے معاشی طور اُتے مسئلیاں دا ساہمنا اے‘ شریعا اسلامی نے وی فرمای اکہ اللہ اپنے بندیاں نُوں جانچدا اے‘ ایس لئی تجارت کرن والے تاجراں نُوں چاہیدا اے کہ اوہ اِک دوجے نال تعاون کرن تاں جے ایہناں آیام شدت توں باہر نکلیا جا سکے۔ اوہناں نے کہیا کہ اللہ نے سود نُوں حرام تے یتیم دا مال کھان نُوں حرام کہیا اے‘ نال ای اوہناں نے قرآن پاک دیاں ایہناں آیتاں دا حوالا دِتا جہدے وچ اِک دوجے نال لین دین دا ذکر کیتا گیا۔ حقوق العباد دی اہمیت اُتے زور دیندیاں ہویاں اوہناں نے کہیا کہ کسے دا حق نہیں مارنا چاہیدا اے‘ اِک دوجے دے نال تعاون کرنا چاہیدا اے‘ اللہ دے سوا کسے نُوں رلتی نہ بنایا جاوے‘ ایہدے بعد ماپیاں دا احترام کیتا جاوے‘ایتھوں تک کہ اوہناں دے ساہمنے اُف تک نہ کیتا جاوے‘ اوہناں نال نظراں جھُکا کے گل کرو‘ ایہ ضروری اے کہ ماپیاں دا احترام کیتا جاوے۔ اوہناں نے کہیا کہ اللہ قرآن وچ عدل و انصاف دا حکم دیندا اے تے برائی توں بچن دا کہندا اے‘ اللہ نے ارشاد فرمایا کہ جے اہل ایمان دے دو گرُپاں وچ لڑائی یاں اختلاف ہو جاوے تے تُسیں اوہناں وچ ثالث بن کے ایہنوں ختم کرو کیوں جے مسلمان آپس وچ بھرا بھرا نیں‘ اسلامی ریاست وچ رہندیاں ہویاں ایہ ذمے داری اے کہ جدوں اوہنوں نماز لئی بلایا جاوے تے وضو دا انتظام کرے‘ خطبا حج وچ اوہناں نے فرمایا کہ اللہ نے کوئی ایہو جہی بیماری نہیں دِتی جہدا علاج نہ ہووے۔ حضور محمد ﷺ نے فرمایا کہ طاعون زدا علاقے وچ تُسیں داخل نہ ہووے تے جہڑے ایس علاقے وچ موجود نیں اوہ اوتھوں باہر نہ نکلن۔ سعودی حکومت دیاں کاوشاں نُوں بیان کردیاں ہویاں شیخ عبداللہ بن سلیمان نے کہیا کہ مصائب دے باوجود سعودی حکومت نے حج دا انتظام کیتا تے حاجیاں نُوں سہولتاں فراہم کیتیاں تے کوشش کیتی کہ مسلماناں نُوں ایس بیماری توں بچایا جا سکے۔ اوہناں نے کہیا کہ اج دا دن سارے دناں توں وڈا دن اے۔ نال ای اوہناں نے کہیا کہ عالم اسلام نُوں چاہیدا اے کہ اللہ دا ذکر ادا کرو تے ایہناں مصیبتاں تے اوکڑاں لئی دُعا کرو تے میں وی ایہ دُعا کردا آں کہ مسلمان ہر طرحاں دی بدعت تے خرافات توں دور رہن‘ اللہ دے حکم نال ای مصیبتاں آندیاں تے دور ہوندیاں نیں‘ اوکڑاں دائمی نہیں اللہ دا فرمان اے‘ ہر مشکل دے بعد اسانی اے۔ خطبا حج وچ کہیا گیا اے کہ دنیاوی زندگی کدی مصائب تے اوکڑاں توں خالی نہیں ہوندی‘ مصیبتاں تے اوکڑاں انسان نُوں اللہ دے ہون دا یقین دواندیاں نیں‘ اللہ انسان لئی مشکل نیں آسانی چاہندا اے۔ خطبا حج وچ کہیا گیا اے کہ قرآن مجید وچ عدل و انصاف دا درس دِتا گیا اے‘ اسلام کسے وی قسم دے فتنے نُوں کھلارن توں روکدا اے‘ اسلامی تعلیمات ہر اوس شے توں اجتناب دا درس دیندیاں اے جو انسانی صحت لئی مضر ہون‘ اللہ نے انبیاء نُوں تذکیہ نفس لئی گھلیا‘ اللہ نے مرد و عورت نُوں آپسی احترام تے خیال رکھن دا درس دِتا اے‘ اسلام غرباء تے مساکین دے حقاں دا تحفظ رکھن دا وی درس دیندا اے۔ شیخ عبداللہ بن سلیمان نے کہیا کہ نبی کریم ﷺ نے فرمایا کہ جے کسے تھاں وبائی روگ کھلرے تے اوتھے نہ جاؤ‘ جہڑی تھاں وبائی روگ ہووے اوتھوں د ے لوک کسے ہور تھاں نہ جان۔