پاکستانیاں دے حقاں دے خلاف کوئی وی قانون سازی نہیں ہون دواں گے: بلاول بھٹو زرداری……٭رویل نیوز٭

لاہور (نمایندا رویل) چیئرمین پاکستان پیپلز پارٹی (پی پی پی) بلاول بھٹو زرداری نے کہیا اے کہ تحریک انصاف دی حکومت انسدادِ دہشتگردی ایکٹ ترمیمی بل 2020 دے حوالے توں کنفیوژن پیدا کر رہی اے‘ اسیں پاکستانیاں دے خلاف کوئی قانون سازی نہیں ہون دواں گے۔ اسلام آباد وچ پریس کانفرنس کردیاں ہویاں چیئرمین پی پی پی نے کہیا کہ اج جو حکومت نے کیتا اے اوہ سمجھ توں باہر اے۔ اوہناں نے سپیکر قومی اسمبلی نُوں تنقید دا نشانا بناندیاں ہویاں کہیا کہ سپیکر اسد قیصر نے اج جہڑا کردار ادا کیتا اوہ مناسب نہیں سی‘ لگدا اے کہ سپیکر قومی اسمبلی نُوں ایہ سبھ کرن دا حکم مِلیا سی۔ بلاول بھٹو زرداری نے ایہ وی کہیا کہ سپیکر قومی اسمبلی اپنا کم ٹھیک طریقے نال نہیں کر رہے‘ سپیکر کسے وی جماعت دا حمایتی نہیں ہوندا۔ بلاول دا کہنا سی کہ اِک بل جہڑا غیر متنازع ہو سکدا سی تُسیں متنازع کر دِتا۔ چیئرمین پی پی پی نے کہیا کہ اسیں ترمیم لے کے آئے ساں‘ پر حکومت چاہندی اے کہ اپوزیشن بولے ای نہ‘ حکومت میری یاں اپوزیشن دی زبان بند نہیں کر سکدی۔ اوہناں دا کہنا سی کہ پیپلز پارٹی نے ہمیشا ملک دے اتحاد لئی کم کیتا‘ دہشتگردی دا مقابلا کیتا‘ اسیں جمہوریت تے انسانی حقاں دے حق وچ آں‘ حکومت ولوں دِتا گیا بل لوکائی لئی اوکڑاں پیدا کر سکدا اے‘ حکومت ایس بل دے حوالے توں کنفیو ژن پیدا کر رہی اے۔ اوہناں دا کہنا سی کہ پیپلز پارٹی نے ایس حکومت دے آن توں پہلے انتہا پسندی دا مقابلا کیتا‘ پیپلز پارٹی نے گرین پاسپورٹ دی عزت بنائی‘ پاکستانیاں دے حقاں دے خلاف کوئی وی قانون سازی نہیں ہون دواں گے‘ ایف اے ٹی ایف دے بل دے ناں اُتے حکومت نے آمرانا طرز عمل اختیار کیتا‘ حکومت نے ایس بل دے حوالے توں پارلیمنٹ وچ اپوزیشن نُوں گل نہیں کرن دِتی‘ اسیں کسے بندے نُوں 6 مہینیاں لئی لا پتا بنان دا کم نہیں ہون دواں گے‘ اسیں ہر بل نُوں ویکھ رہے آں‘ جے ایہ سمجھدے نیں کہ اپنے آپ نُوں آمرانا طاقت دین گے تے اسیں ایہ نہیں ہون دواں گے‘ جدوں تک ایوان دا حصا آں حکومت دیاں آمرانا کوششاں توں لوکائی نُوں اگاہ کراں گے‘ این آر او‘ این آر او کَہ کے اصل این آر او نُوں لُکان دی کوشش کیتی جا رہی اے جو کلبھوشن نُوں دِتا گیا۔ چیئرمین پی پی پی نے کہیا کہ جہنوں کشمیر دا سفیر بننا سی اج کلبھون دا وکیل اے تے سانوں این آر او‘ این آر او کہندے نیں۔ اوہناں دا کہنا سی کہ حکومت جھوٹھ دی بنیاد اُتے چاہندی اے کہ ایف اے ٹی ایف نُوں نیب دے نال کیتا جاوے‘ ہر تاجر نے کہیا کہ نیب تے معیشت نال نال نہیں چل سکدے‘ پی ٹی آئی حکومت اپنے آرڈیننس نُوں پاس کرن لئی ساڈے نال گل کر رہی سی‘ مالم جبا‘ بی آر ٹی‘ کھنڈ‘ آٹا چوری اُتے این آر او دلوایا گیا۔ اوہناں نے سوال چُکیا کہ مشیر احتساب و داخلا شہزاد اکبر سمجھا سکدے نیں کہ 2 سال توں اپنی غیر ملکی جائیداد کیوں ڈکلیئر نہیں کیتی سی؟ جے قاضی فائز عیسیٰ دی گھروالی توں ثبوت منگ رہے نیں تے آپ وی جواب دین۔ بلاول بھٹو زرداری دا کہنا سی کہ عمران خان نے آپ سبھ توں ودھ ایمنسٹیز لئیاں‘ اج اپنے سنگیاں دی کرپشن دا تحفظ کر رہے نیں۔ اوہناں نے کہیا کہ پاکستان پیپلز پارٹی تے مسلم لیگ (ن) اپنے اُتے لائے گئے الزاماں دے جوابات عدالت وچ دے رہی اے جد کہ وزیراعظم عمران خان حکم امتناع دے پچھے لُک رہے نیں۔