کشمیریاں نال اکسُرتا دے  وکھالے واسطے پنج اگست نوں پورے دیس وچ اِک منٹ دی خموشی ہووے گی: وزیر خارجا شاہ محمود قریشی ……٭رویل نیوز٭

اسلام آباد (اُچیچا نمایندا) وزیر خارجا شاہ محمود قریشی نے کشمیریاں نال اکسُرتا دے اظہار لئی 5 اگست نُوں استحصال دیہاڑ مناون دا اعلان کردیاں ہویاں کہیا اے کہ 5 اگست نُوں پورے ملک وچ 01 منٹ دی خاموشی ہووے گی تے پوری دنیا دے آگوواں نُوں خطوط لکھے جان گے‘ ساڈی منزل سری نگر‘ ساڈی نظر سری نگر اُتے اے‘ سری نگر دی جامع مسجد وچ نوافل ادا کراں گے‘ شائننگ انڈیا اج برننگ انڈیا وچ تبدیل ہو چکیا اے‘ پاکستانی قوم کشمیریاں دے نال کل وی کھلوتی سی اج وی کھلوتی اے‘ جدوجہد ازادی وچ کشمیریاں دا لہو شامل اے‘ بھارت نے کشمیریاں دا جھنڈا کھوہیا اوہناں دا تشخص مٹان دی کوشش کیتی۔ جمعے نُوں وزیر اطلاعات شبلی فراز تے معاون خصوصی معید یوسف دے نال اسلام آباد وچ نیوز کانفرنس کردیاں ہویاں وزیر خارجا شاہ محمود قریشی نے کہیا کہ وزیراعظم 5 اگست نُوں کشمیریاں نال اکسُرتا دے اظہار لئی تواریخی خطاب کرن گے‘ 5 اگست نُوں پورے پاکستان وچ 1 منٹ دی خاموشی ہووے گی‘ کشمیر ہائی وے دا ناں سری نگر ہائی وے رکھ رہے آں تے انشاء اللہ سری نگر دی جامع مسجد وچ نوافل ادا کراں گے۔ اوہناں نے کہیا کہ جنیوا وچ جدوں کشمیریاں اُتے ظلم دی گل ہوئی تے بھارتی نمایندا مونہ لُکا رہیا سی‘ کشمیریاں دے علاوا ہور مذہباں نے وی کشمیر دی ونڈ نُوں قبول نہیں کیتا۔ شاہ محمود قریشی دا کہنا سی کہ شائننگ انڈیا اج برننگ انڈیا وچ تبدیل ہو چکیا اے‘ سکھ برادری نے وی مقبوضا کشمیر اُتے بھارتی غاصبانا قبضے خلاف بھرواں احتجاج کیتا‘ وزارت کارجا پوری طرحاں اگاہ اے کہ مسئلا کشمیر نُوں کس طرحاں اجاگر کرنا اے‘ مسئلا کشمیر نُوں اجاگر کرن لئی سفارتی کوششاں تیز کیتیاں جان گیاں‘ کشمیری شہدا دا خون بولے گا تے بھارتی ظلم و جبر دی گواہی دیوے گا۔ وزیر خارجا نے کہیا کہ دنیا جاندای اے کشمیریاں دے بنیادی حق اج وی سلب نیں‘ کجھ لوکاں نے کشمیر ایشو توں توجا ہٹان دی کوشش کیتی‘ پاکستانی قوم کشمیریاں دے نال کل وی کھلوتی سی اج وی کھلوتی اے‘ جدوجہد ازادی وچ کشمیریاں دا لہو شامل اے‘ اوہناں نے کہیا کہ میں کون ہوندا آں کشمیریاں دی تواریخ دَسن والا‘ اوہ آپ بڑے چنگے طریقے نال جاندے نیں‘ جہناں دا لہو ایس جدوجہد وچ شامل ہووے اوس توں بہتر کون جان سکدا اے‘ 5 اگست 2019 کشمیریاں دی ایس جدوجہد دا اِک نواں موڑ اے‘ اِک نویں باب دا وادھا ہویا اے۔ بھارت نے کشمیریاں دا جھنڈا بزور بازو کھوہیا اوہناں دا تشخص مٹان دی کوشش کیتی پر کشمیریاں نے ایہنوں ذہنی طور اُتے قبول نہیں کیتا بھاویں اوہ ہندو پنڈت اے یاں لداخ وچ رہن والا بدھ مت یاں وادی وچ رہن والا مسلمان اے کسے نے ذہنی طور اُتے نہ ایہنوں منیا اے نہ قبول کیتا اے تے اوہناں دی جدوجہد جاری اے۔ اوہناں نے کہیا کہ مقبوضا کشمیر بین الاقوامی طور اُتے تسلیم شدا متنازعا علاقا اے‘ جہنوں اسیں نہیں سلامتی کونسل دیاں قرار داداں متنازع کہندیاں نیں جہنوں بھارتیا جنتا پارٹی (بی جے پی) دی سرکار نے ضم کرن دی کوشش کیتی اے جہنوں کشمیریاں تے پاکستان نے رَد کیتا۔ بھارت نے ری آرگنائزیشن ایکٹ نافذ تے ایہدے نال ڈومیسائل قوانین وی شامل کیتے جہدا مقصد بھارت دی کلی مسلم اکثریتی ریاست نُوں اقلیت وچ تبدیل کرن دے ارادے کھل کے ساہمنے آ گئے۔ا وہناں نے کہیا کہ کرونا دے بعد دنیا نُوں پتا لگ گیا کہ لاک ڈاؤن کیہ اے؟ لاک ڈاؤن دی تکلیف کیہ ہوندی اے تے سبھ توں وڈا ملٹری زون مقبوضا کشمیر اے جتھے کشمیری 1 سال توں لاک ڈاؤن دا ساہمنا کر رہے نیں‘ 5 اگست کشمیریاں دی جدوجہد دا نواں موڑ اے۔ بھارت نے مقبوضا کشمیر نُوں 3 ٹکڑیاں وچ ونڈن دی کوشش کیتی‘ وزیراعظم عمران خان نے یورپی یونین تے یو این اجلاس وچ کشمیریاں دا مقدما پیش کیتا‘ وزیر خارجا دا کہنا سی وزیراعظم دے جنرل اسمبلی وچ خطاب وچ بھارتی مندوب مونہ لُکا رہے سن‘ وزیراعظم دی جنرل اسمبلی وچ تقریر دوران 25 ہزار دا مجمع باہر کھلوتا سی‘ پہلے کدی انج نہیں ہویا پاکستانی وزیراعظم دی تقریر دے دوران اینا وڈا مجمع ہووے‘ پاکستانی سیاسی جماعتاں وچ تفرقے دیاں بھارتی کوششاں ناکام ہوگئیاں‘ اوہناں نے دَسیا کہ اقوام متحدا دے جنرل سیکریٹری نُوں مسئلا کشمیر اُتے 9 خط لکھ چُکیا آں‘ ایہ خطوط منزل دے حصول وچ کردار ادا کرن گے۔ اوہناں دا کہنا سی کہ مسئلا کشمیر اِک سال وچ 3 وار سلامتی کونسل وچ چُکیا گیا‘ 55 سال وچ کشمیر دیاں قرار اداں گرد تے دھول وچ دَب گئیاں سن۔ شاہ محمود قریشی نے کہیا کہ مقبوضا کشمیر وچ ناحق خوگ وگیا اے‘ جہڑا بولے گا‘ کشمیریاں نال وعد ا کردے آں تہاڈی ترجمانی کراں گے‘ 5 اگست نُوں اِک پلان مرتب کیتا اے کہ پوری قوم استحصال دیہاڑ منائے گی۔ اوہناں نے کہیا کہ وزیراعظم عمران خان نے قوام متحدا دے 74 ویں اجلاس وچ ثابت کیتا کہ اوہ حقیقی کشمیریاں دے سفیر نیں‘ پر ایس معاملے اُتے پالیسی بن چُکی سی جہدا برملا اعتراف تسنیم اسلم کر چکے نیں کہ پاکستان مسئلا کشمیر اُتے اواز بلند نہ کرے۔ شاہ محمود قریشی نے ہور کہیا کہ ترکی‘ ملائیشیا تے ہور ملکاں نے کشمیر اُتے ساڈے مؤقف دی تائید کیتی تے ایس وجھا تو معاملا تازا ہو گیا تے یورپی یونین وچ ایس معاملے نُوں چُکیا گیا اوہ وی ستایش جوگ اے‘ اوہناں نے کہیا کہ کشمیر دے معاملے اُتے اسیں سیاسی جماعتاں اِک ہوندیاں آں تے اِک رہواں گے‘ شاہ محمود قریشی نے کہیا کہ عمران خان دیاں 120 توں ودھ انگیجمنٹ نیں‘ کشمیر معاملے اُتے جہڑیاں ستایش جوگ نیں۔ انٹرنیشنل آرگنائزیشن نے جنی تنقید بھارت اُتے کیتی اوہ کدی نہیں کیتی گئی‘ چین‘ ترکی‘ ملائیشیا نُوں جانچ کے ویکھیا جاوے اوہناں نے کشمیر اُتے کیہ کہیا جو کہ بھارت لئی پریشانی دا کارن اے۔ شاہ محمود قریشی نے کہیا کہ میں وزیر خارجا پہلے وی رہیا تے ہُن وی پر زمین اسمان دا فرق اے‘ ہُن کلیرٹی اے‘ 5 اگست 2020 آن والا اے تے ایہدے اُتے پیغام دینا چاہندا آں کشمیر وچ شہادتاں کر کے اوہناں دیاں نعشاں ماپیاں نُوں نہ دے کے ظلم عظیم کیتا گیا جہدے پاروں دل خون دے اتھرو روندا اے‘ مقبوضا کشمیر دی ساری قیادت نُوں سلام پیش کردا آں‘ اج پیغام دینا چاہندا آں کہ سانوں تہاڈے اُتے فخر اے تے تہاڈے نال نال چلاں گے جدوں تک تُسیں لوک جیلاں وچ پابند او اسیں تہاڈی اواز بلند کراں گے‘ بھارت نُوں چیلنج اے کہ تُسیں ظلم دی انتہا کر دوو اسیں کدی جھُکاں گے نہیں‘ اِک معصوم بچے جہڑا نانے دی چھاتی اُتے بیٹھا اے اوہدی تصویر نے سب دی عکاسی کر دِتی تے ہُن وی دنیا نہ سمجھے تے فیر اللہ جانے کون بشر اے‘ 5 اگست دے موقع اُتے ہر سوشل میڈیا اُتے مہم لانچ کرن جا رہے آں جو کہ کشمیر مشن اُتے ہووے گی‘ اوہناں نے کہیا کہ میری سارے سفیراں توں گزارش اے کہ مینوں تقریب نہیں میڈیا نال گلبات چاہیدی اے‘اسیں 5 اگست نُوں ای دَساں گے کہ اسیں کیہ کرن جا رہے آں۔ شبلی فراز نے کہیا کہ ساڈی حکومت نے اِک نرالے جذبے نال کشمیر دا مسئلا چُکیا اے تے میری اپیل اے کہ 5 اگست نُوں ساڈا میڈیا ساڈا ساتھ دیوے‘ معاون خوصی معید یوسف نے کہیا کہ ایس موقع اُتے قوم اپنا نیریٹیو ساہمنے لیائے‘ استحصال دیہاڑ ایس لئی منا رہے آں اِک سال لنگھ گیا ہندستان بین الاقوامی قوانین دیاں خلاف ورزیاں کر رہیا اے‘ ہُن شملا معاہدا وی توڑ دِتا اے۔