کشمیریاں دی ازادی لئی جدوجہد کردے رہواں گے‘ اقوام متحدا پنے وعدے پورے کرے:صدر پاکستان ……٭رویل نیوز٭

اسلام آباد (نمایندا رویل) صدر مملکت ڈاکٹر عارف علوی نے کہیا اے کہ ساڈا تے کشمیریاں دے صبر دا پیمانا لبریز ہون دے نیڑے اے‘پاکستان کشمیریاں دی ازادی چاہندا اے‘ دنیا اکھاں کھول کے بھارت دا ظلم ویکھے۔اسلام آباد وچ کشمیر ریلی نال خطاب دے دوران صدر مملکت دا کہنا سی کہ کشمیر استحصال دیہاڑ مناون دا مقصد دنیا نُوں احساس دلوانا اے‘مقبوضا کشمیر وچ لاک ڈاؤن وچ ہر شے دی بندش اے‘ کشمیر دی دھرتی اُتے استحصال دیہاڑ منایا جا رہیا اے جد کہ اقوام متحدا وچ پاکستان نال کیتا گیا کوئی وعدا پورا نہیں کیتا گیا۔ صدر مملکت عارف علوی نے کہیا کہ کشمیر ہندستان دے نال اِک قدم چلن نُوں تیار نہیں‘ بھارت نے کشمیر دی سرزمین اُتے قبضا کر رکھیا اے جد کہ کشمیر وچ حالات پُرامن نیں تے میڈیا نُوں اجازت دِتی جاوے۔ اوہناں نے کہیا کہ بھارت دی ہندوتوا سوچ نے خطے دے امن نُوں خطرے وچ پا دِتا‘ بھارت نے اسرائیل توں ظلم کرنا سکھیا پر کشمیری اپنے آپ نُوں کلا نہ سمجھن اسیں اوہناں دے نال آں۔ ڈی چوک اُتے خطاب وچ صدر مملکت عارف علوی نے کہیا کہ کشمیر اُتے ہندستان نے اِک سال توں ظلم ڈھائے ہوئے نیں‘ مقبوضا کشمیر وچ ہسپتال سنے سبھ کجھ بند اے جد کہ آئین وچ تبدیلی کرنا کشمیریاں نُوں قبول ہوندا تے اج کرفیو نہ لانا پیندا‘ پاکستان نے امن لئی ابھےنندن نُوں واپس کیتا۔ صدر عارف علوی نے کہیا کہ ساڈا تے کشمیریاں دا صبر دا پیمانا لبریز ہون دے نیڑے اے‘ اسیں کشمیریاں دی ازادی لئی جتن کردے رہواں گے‘ اقوام متحدا پنے وعدے پورے کرے جد کہ او آئی سی کشمیر دے معاملے اُتے مظلوماں دا ساتھ دیوے۔ اوہناں دا کہنا سی کہ 5 اگست دا اقدام فاشسٹ ہندوتوا دی عکاسی کردا اے۔ 24 اکتوبر 1947 نُوں کشمیری لوکائی نے ازادی دا اعلان کیتا سی پر نہرو دور توں اج تک کشمیریاں اُتے شکنجا کدی گھٹ نہیں ہویا۔ لکھاں کشمیریاں نُوں شہید کیتا گیا۔ بھارت نے صرف کشمیر دے مسلماناں دے خلاف پیلٹ گن استعمال کیتیاں۔ صدر مملکت نے عالمی ضمیر جھنجھوڑدیاں ہویاں کہیا کہ دنیا اکھاں کھول کے کشمیر وچ انسانیت سوز مظالم نُوں ویکھے‘ اوتھے بچے دے ساہمنے نانے نُوں مار دِتا گیا۔ کیہ دنیا نُوں ایہ ظلم نظر نہیں آ رہیا؟ ایہ سرا سر ظلم اے۔ بچے دے نانے دی لاش اُتے پَیر رکھ کے تصویراں لوائیاں گئیاں۔ اوہناں نے دنیا نُوں ماضی دی یاد دواندیاں ہویاں کہیا کہ بھارت نے اقوام متحدا نال استصواب رائے کروان دا وعدا کیتا سی‘ پاکستان نے اقوام متحدا اُتے بھروسا کیتا۔ ایہدے علاوا بھارت نے شملا معاہدے اُتے وی حیلے بہانے بنائے۔ بھارت نے ہروعدے تے بیان توں انکار کیتا۔ ایہدی ضد لوکاں دی خاطر نہیں سگوں زمین دی خاطر اے۔ پاکستان کشمیر دے لوکاں نُوں ازاد کروانا چاہندا اے‘ پاکستان کدی وی کشمیریاں نُوں کلا نہیں چھڈے گا۔